بلخ کې د دولتي ښوونځیو د زده کوونکو او ښوونکو له منځه سرچینې وايي، طالبانو د «سزا ورکلولو په ګواښ» سره، د زمري د ۲۴ مې، واک ته د دې ډلې د رسېدو د پنځمې کلیزې په مناسبت، ملاتړو پروګرامو کې د زده کوونکو او ښوونکو ګډون جبري کړی دی.
رخشانه: د بلخ مرکز مزارشیف ښار کې د بېلا بېلو دولتي ښوونځیو شپږو تنو زده کووکو رخشانې رسنۍ ته ویلي، د ښونځیو مدیرانو له اتم تر دولسم ټولګي پورې زده کوونکو او ښوونکو ته امر کړی، چې راتلونکې شنبې د طالبانو په ملاتړ واټونو ته ووځي.
د زده کوونکو په وینا، د ښوونځیو مدیرانو امر کړی، چې د راتلونکې اوونۍ شنبې ورځ باید ټول زده کوونکي په غونډو او د طالبانو په ملاتړ لاریونونو کې د دغه ډلې بیرغ له ځان سره ولېږدوي او د دوی پر ملاتړ شعارونه ورکړي.
د زده کوونکو په وینا، د دولتي ښوونځیو مدیرانو خبرداری ورکړی، هغه زده کوونکي، چې راتلونکې شنبې د طالبانو په ملاتړ غونډو کې ګډون ونه کړي، سزا به ورکړل شي.
د دولتي ښوونځیو مدیرنو زده کوونکو ته ویلي، هغه زده کوونکې چې راتلونکې شنبې د طالبانو په ملاتړ غونډو کې ګډون ولري، تشویقي نمرې به تر لاسه کړي.
مزارشریف ښار کې یو تن زده کوونکي ویلي دي: «یوه ښوونکي موږ ته و ویل، چې راتلونکې اوونۍ باید د طالبانو سپین بیرغ وپېری او ښوونځي ته حاضر شۍ.»
د دې زده کوونکي په وینا، هغه زده کوونکي چې راتلونکې اوونۍ د طالبانو په ملاتړ غونډو کې ګډون ونه کړي، له ۱۰ ورځې غیر حاضرۍ او هغه زده کوونکي چې دې غوندو ته حاضر نه شي له شپږ ورځو غیرحاضرۍ سره به مخ شي.
مزارشریف ښار کې یو بل زده کوونکي ویلي، د ښوونځي مدیر له زده کوونکوغوښتي، چې د «ښوونځي د آبرو» ساتلو په پار، د طالبانو په ملاتړو غونډو کې ګډون وکړي.
د طالبانو د کار او ټولنیزو چارو وزارت دوه ورځې وړاندې، د راتلونکې شنبې د زمري ۲۴ مه، پر هېواد د دې ډلې د واکمنېدو ورځ عمومي رخصتي اعلان کړه.
طالبانو په تېرو پنځو کلونو کې، په وار وار د دولتي ښوونځیو له زده کوونکو او ماشومانو په خپلو تبلیغاتي پروګرامونو او ملاتړو غونډو کې د توکو په شان ګټه اخیستې ده.
