پر افغانستان د طالبانو د واکمنۍ له پنځمې کلیزې سره سم، د بښنې نړیوال سازمان د سویلي آسیا څانګې ویلي، دا هېواد لا هم د پراخو او پرلپسې بشري حقونو د سرغړونو مرکز دی.
رخشانه: دې بنسټ نن (شنبې د زمري ۲۴ مه) په خپله اېکس پاڼه د یوه پوسټ په خپرولو سره لیکلي «چوپتیا ماته کړی او په افغانستان کې له بشري حقونو سرغړونو ته پای ورکړی.»
د بښنې نړیوال سازمان لیکلي، پر افغانستان د طالبانو پنځه کلنه واکمني له «ځورولو او جنسیتي تبعیض، شکنجې، خپل سرو نیونو او سانسور» سره مل ده.
دې بنسټ زیاته کړې: «دا ټولې پېښې په داسې شرایطو کې رامنځ ته کېږي، چې هېڅ ځواب وینه او سزا ورکول نشته. د نړیوالې ټولنې غبرګون هم په غوره حالت کې کمزوری او ناکافي وو.»
د بښنې نړیوال سازمان وايي، افغانستان د ۲۰۲۱ له اګست را په دېخوا د لا ډېرو بشري حقونو د سرغړونو په لور روان دی او ښځې د ژوند په ټولو برخو کې له ګډون کولو منع شوې دي.
د دې بنسټ په وینا، پر افغانستان د طالبانو په پنځه کلنه واکمنۍ کې، ربړونه او ناوړه چلند، خپل سرې نیونې، جبري بې درکه کول، سانسور او داسې نور کارونه په بشپړ خوندتیوب سره دوام لري.
د بښنې نړیوال سازمان لیکلي، د ښځو د بیان آزادي، سوله ییزه غوندې او د ښځو سیاسي ګډون پر حق باندې سخت بندیزونه هم له ځواب وینې پرته دوام لري.
دې بنسټ ټینګار کړی، چې د بدني سزاوو بېرته راګرځېدل او د یوه خپلواک قضايي سیستم نشتوالي دا وضعیت لا کړکېچن کړی او قربانیان یې عدالت ته د لاسرسي لپاره له کومې لارې پرته پرېښي دي.
د افغانستان د بشري حقونو مدافع ترینه ودود ویلي دي: «دا راته د حیرانتیا وړه ده، چې نړیواله ټولنه لا هم انتظار کوي، چې طالبان به بشري حقونو ته درناوی وکړي.»
د بښنې نړیوال سازمان وايي، نړیواله ټولنه تر اوسه نه ده توانېدلي، چې په افغانستان کې د بشري حقونو د سرغړونو پای ته رسولو لپاره، کوم مانا لرونکی ګام پورته کړي.
دې بنسټ ټینګار کړی، چې یوازې شعارونه ورکول نه شي کولی ځپنې پای ته ورسوي او دولتونه باید د جدي ګامونو په پورته کولو سره د ځپنې دې ارټ ته د پای ټکی کېږدي.
