د اروپايي ټولنې د پارلمان غړې او پر طالبانو نیوکه کوونکې هانا نیومن وايي، دې ډلې په تېرو پنځو کلونو کې هېڅ ډول تغیر نه دی کړی او د ښځو په وړاندې یې خپل محدودیتونه پای ته نه دي رسولي.
رخشانه: نیومن د اګست پنځلسمې، پر هېواد د طالبانو د واکمنۍ د پنځمې کلیزې سره سم په خپله اېکس پاڼه لیکلي دي، «موږ د افغان وګړو په تړاو ناکام پاتې یو.»
نوموړې پر هېواد د طالبانو له واکمنېدو وروسته د افغان وګړو وتلو ته په اشارې ویلي دي «ځینې انځورونه هېڅ وخت د انسان له ذهن څخه نه پاکېږي. هغه انسانان چې د یوه پورته شوې نظامي الوتکه پورې یې منګولې نښلولې وې.»
نیومن وايي، افغان وګړي له هېواده د وتلو پر مهال، بهرنیو ځواکونو ته د خپلو ماشومانو په سپارلو سره «له طالبانو پر هغوی ډېر باور درلود.»
د اروپايي ټولنې د پارلمان دې غړې او د طالبانو منتقدې، د ۲۰۲۱ په اګست کې د طالبانو بیا واک ته رسېدل «زموږ ماتې» بیان کړې ده.
دې ویلي، په افغانستان د طالبانو په پنځه کلنه واکمنۍ کې، ښځې او نجونې په منظم ډول زده کړو، کارموندنې او عمومي ژوند ته له لاسرسي حذف شوې دي.
هغې زیاته کړې، د ۲۰۲۱ په اګست کې د طالبانو د بیا واک ته رسېدو وروسته «په عام محضر کې دورې وهل او سنګسارول بیا راوګرځېدل.»
نیومن بروګسل ته د طالب پلاوي سفر ته په اشارې ویلي «آلمان د افغان وګړو د ایستلو په تړاو له طالبانو سره تعامل ته وړاندې شو او په بن او برلین کې یې د افغانستان د کونسلګریو واک دغه ډلې ته وسپاره.»
نوموړې بروګسل ته د طالب پلاوي سفر د افغان وګړو په تړاو د آلمان او اروپا «دویمه ماتې» وبلله او ویې ویل «دا ماتې سوکه، عادي او ګام په ګام ده.»
نیومن په المان او اروپا کې طالبانو ته د افغانستان د کونسلګریو په سپارلو اندېښنه وښوده وايي، دا موضوع په المان او اروپا کې د افغان وګړو لپاره «له پولې وتلې ځپنه» ده.
هغې لیکلي: «کله چې استبدادي رژيمونه په بهر کې اشخاصو، کورنیو او د هغوی شخصي معلوماتو ته لاسرسی پیدا کوي، نو ځپنه په پوله کې نه تم کېږي.»
