د اګست پنځلسمه، پر هېواد د طالبانو د واکمنۍ د پنځمې کلیزې په مناسبت د «افغان ښځو د اعتراضي غورځنګونو خپلواک ائتلاف» ویلي، په تېرو پنځو کلونو کې د هېوادوالو حقونه په پراخ ډول تر پښو لاندې شوي دي.
رخشانه: د «افغان ښځو د اعتراضي غورځنګونو خپلواک ائتلاف» نن (شنبې د زمري ۲۴ مه) په یوه بیانیه کې ویلي، د اګست پنځلسمه د افغانستان د معاصر تاریخ د یوه تر ټولو تور فصل پیل دی.
د ښځو د اعتراضي غورځنګونو په بیانیه کې راغلي دي، پر هېواد د طالبانو په واکمنېدو سره، د میلیونونه افغان وګړو، په ځانګړې توګه د ښخو او نجونو آزادي، عدالت، انساني کرامت او اساسي حقونه، په پراخه او منظمه توګه تر پښو لاندې شوي دي.
د ښځو اعتراضي غورځنګونو لیکلي، د طالبانو پنځه کلنه واکمني له «ځپلو، تبعیض، محرومیت، جبري کډه کولو، بېوزلۍ او له لومړنیو انساني حقونو انکار کولو» سره مل وه.
د دې غورځنګونو په وینا، افغان ښځې په دې تېرو پنځو کلونو کې له زده کړې، کار، سیاسي او ټولنیز ګډون او په ټولنه کې د خپلواکه حضور څخه محرومې شوې او هېواد د ښځو لپاره په زندان بدل شوی دی.
د ښځو د اعتراضي غورځنګونو ائتلاف د طالبانو واکمنۍ په غندلو سره، له خلکو غوښتي، چې د استبداد، تبعیض او له بشري حقونو د سرغړونو په وړاندې د ملي پیوستون په ساتلو سره مقاومت وکړي.
د دې ائتلاف غړو له ملګرو ملتونو، دولتونو او د بشري حقونو له بنسټونو غوښتي، چې د افغان وګړو په ځانګړې توګه د ښځو او نجونو ناورین زېږوونکي وضعیت نور له پامه ونه غورځوي.
دوی ویلي، د جنسیتي توپیر، منظمې څپنې او د بشري حقونو د پراخ سرغړاوي په وړاندې چوپتیا، د بشري حقونو نړیوالو ارزښتونو سره د ظلم او خیانت د عادي کولو په مانا ده.
معترضو ښځو پر طالبانو د سیاسي او حقوقي فشارونو د زیاتوالي، د ښځو او مدني غورځنګونو د ملاتړ، د بشري حقونو د سرغړونکو د ځواب ویلو او د افغانستان له خلکو سره د پیوستون غوښتنه وکړه.
