المان کې مېشت یو شمېر افغان وګړو او فعالانو، پر افغانستان د طالبانو واکمنۍ د پنځمې کلیزې په مناسبت په یوه اعتراضي غونډه کې د طالبانو له سیاستونو و محدودیتونو سره خپل مخالفت اعلان کړ.
رخشانه: د دې اعتراضي غونډې ګډنوالو پرون شنبې د (زمري ۲۴ مه) د ۲۰۲۱ د اګست۱۵ مه، «د افغانستان په تاریخ کې یوه توره ورځ» وبلله.
فعالانو او افغان وګړو «طالبانو ته نه»، «طالبان ترهګر دي» او «طالبان په رسمیت مه پېژنۍ» شعارونو په ورکولو سره، د طالبانو له پالیسیو او محدودیتونو سره خپل مخالفت وښود.
د دې اعتراضي غونډې ګډنوالو همدارنګه د «تحصیل، کار، آزادۍ» او «ډوډۍ کار، آزادۍ» په شعارونو ورکولو سره، د هېواد له ښځو او نجونو خپل ملاتړ اعلان کړ.
معترضانو له نړیوالې ټولنې د افغانستان د خلکو د اساسي حقونو، په ځانګړې توګه د ښځو او نجونو د زده کړو او کار او د مدني آزادیو او بشري حقونو د ملاتړ غوښتنه وکړه.
دوی له نړیوالې ټولنې، دولتونو او د نړیوالو بشري حقونو له بنسټونو وغوښتل، چې طالبان د افغانستان د خلکو د حقونو د مراعت کولو پرته په رسمیت ونه پېژني.
افغانستان کې د طالبانو د واکمنۍ د پنځمې کلیزې سره سم، خلکو په بېلا بېلو هېوادونو کې د اعترضي غونډو په جوړولو سره، د افغانستان د خلکو وضعیت ته د نړیوالې ټولنې د پاملرنې غوښتنه وکړه.
طالبانو پرون د زمري ۲۴ مه، د خپلې «فتحې ورځې» په توګه یاده کړه او دا ورځ یې واک ته د بیا رسېدو په دلیل په ټول هېواد کې ولمانځله.
دې ډلې په تېرو پنځو کلونو کې په هېود کې د خلکو په ځانګړې توګه د ښځو او نجونو پر حقونو او آزادیو سخت محدودیتونه لګولي دي.
