طالبانو مشر د «مبلغینو نصاب» د قانون په توشېح کولو سره، پر ښځو محدودیتونه زیات کړل وايي، « مېړه د ښځې حاکم دی ښځه اړه ده چې خپل مېړه خوښه وساتي.»
رخشانه: په دې قانون کې چې نن (یکشنبې د زمري ۲۵ مه) د طالبانو د عدلي وزارت له خوا په شپږو څپرکیو کې خپور شوی راغلي، چې د ښځې «نفقې، جامې او اوسېدو ځای» د دین له مخې په مېړه واجب دي.
د طالبانو مشر د «مبلغینو نصاب» کې د څو ښځو لرل په رسمیت پېژندلي ویلي یې دي «د څو ښځو په حالت کې» د هغوی تر منځ عدالت مراعت کول په مېړه واجب دي.
په دې سند کې ویل شوي، په ښځو «ظلم» مه کوۍ. د نکاح پر مهال د ښځې رضایت اړین دی او هېڅوک ښځه په زور په نکاح نه شي ورکولی.
د طالبانو مشر ویلي دی «ښځه مال نه دی، هېڅوک نه شي کولی هغه به بدو کې ورکړي.»
د طالبانو د «مبلغینو نصاب» کې راغلي، ښخه د مېړه له مړینې وروسته اختیار لري چې د «فتنې او فساد د مخنیوي په موخه» بل مېړه وکړي او څوک هغه په زور واده ته نه شي اړ کولی.
د طالبانو مشر په دې قانون کې نارینه وو ته امر کړی، چې «تر سرپرستۍ لاندې ښخې د نامحروم څخه په حجاب کې کړۍ.»
په دې سند کې تبلیغیان مکلف شوي چې خلک د علم تر لاسه کولو ته وهڅوي، دین او جهاد ته یې دعوت کړي او په ځانګړې توګه جهاد ته د تلو «فضلیت، ټپي او شهید کېدو» په اړه معلومات ورکړي.
د طالبانو مشر په دې سند کې مبلغینو ته امر کړی، چې د «اسلامي پولو څخه د ساتنې د فضیلت او د امیر د حکم څخه د اطاعت» په اړه د خلکو سره خبرې وکړي.
د طالبانو د «مبلغینو نصاب» کې راغلي «د هېڅ شخص لپاره وړ نه ده، چې په اسلامي نظام کې د جهادي چارو په اړه، د امیرالمومنین له سلا مشورې پرته ګام پورته کړي.»
د طالبانو مشر په دې سند کې ویلي، د ښځو لپاره جهاد «حج مبرور» دی.
