د کاناډا «تورنتو» ښار کې کې مېشتو یو شمېر افغان وکړو پر هېواد د طالبانو د واکمنۍ د پنځمې کلیزې په مناسبت په یوه اعتراضي غونډه کې ویلي، د ښځو او نجونو په وړاندې د دې ډلې محدودیتونه له بشري حقونو ښکاره سرغړونه ده.
رخشانه: افغان وګړو په دې اعتراضي غونډه کې چې نن (یکشنبې د زمري ۲۵ مه) جوړه شوې وه، «طالبانو ته نه، جنسیتي توپیر ته نه، د آزادۍ، عدالت او خپلواک او آباد افغانستان لپاره» شعارونه ورکول.
په هغه اعلامیه کې چې د دې اعتراضي غونډې د جوړونکو له خوا خپره شوې راغلي، طالبانو میلیونونه افغان وګړي په ځانګړې توګه ښځې او نجونې له خپلو لومړنیو انساني حقونو او آزادیو محرومې کړې دي.
تورینتو مېشتو افغانانانو ویلي، پر افغانستان د طالبانو پنځه کلنه واکمني، ملي مشروعیت نه لري او پر تبعیض، ځپلو او د ښځو په سیستماتیک حذف ولاړه ده.
دوی له زده کړو، کار، آزادۍ، تګ راتګ، سیاسي ګډون او ټولنیز ژوند څخه د ښځو او نجونو سیستماتیک محرومیت ته په اشارې زیاته کړې، دا محدودیتونه د بشري حقونو له بنسټیزو حقونو ښکاره سرغړونه ده.
معترضینو له نړیوالې ټولنې او د بشري حقونو له بنسټونو غوښتي، چې د جرم په توګه د جنسیتي توپیر د رسمیت پېژندې او د هغو د عاملینو د ځواب ویوونکي کولو لپاره جدي او بېړني ګامونه تر سره کړي.
تورنتو کې افغان فعالان وايي، له طالبانو سره هر ډول تعامل باید د افغانستان د خلکو، په ځانګړې توګه د ښځو او نجونو د حقونو، بیان آزادۍ او مدني آزادیو په رعایت کولو پورې مشروط وي.
تورنتو کې مېشتو افغان وګړو د نجونو پر مخ د ښوونځیو او پوهنتونو د ژر تر ژره پرانستو او د ښخو د سیاسي او مدني محدودیتونو د لغوه کېدو غوښته وکړه.
دوی د «پخوانیو نظامیانو او امنیتي ځواکونو د ځپلو، ربړولو او حقونو د ماتولو» په درېدو ټينګار وکړ او په دې برخه کې یې د پلټنو غوښتنه وکړه.
تورنتو کې مېشت افغان وګړو ویلي، خبریالان، رسنیز فعالان او لیکوالان نه باید د خپل لید لوري د بیان له امله زنداني، تهدید یا وګواښل شي.
هغوی له ملګرو ملتونو، د جرمونو ضد نړیوالې محکمې او د بشري حقونو له بنسټونو وغوښتل، چې له بشري حقونو د جدي سرغړونو پېښې او په افغانستان کې احتمالي جرمونه په خپلواکه توګه وڅېړي او عاملین یې ځواب ویوونکي کړي.
