د بدخشان نسي ولسوالۍ کې ځايي سرچینې وايي، په دې ولسوالۍ کې د طالب قوماندان جمعه خان فاتح او پښتنو طالبانو تر منځ د سختو وسله والو نښتو د دوام له امله، روغتیايي مرکزونو، ښوونځیو او بازارونو ته د ښځو او ماشومانو لاسرسی محدود شوی دی.
رخشانه: د بدخشان نسي ولسوالۍ کې لږ تر لږه دریو باوري سرچینو رخشانې رسنۍ ته ویلي، د دواړو لورو تر منځ نښتې د تېرې اوونۍ د سه شنبې (زمري ۲۰) مې راهیسې پیل شوې او په دې وروستیو ورځو کې سختې شوې دي.
سرچینو د هویت پټ ساتلو سره وايي، په تګ راتګ د محدودیتونو او د جګړې له وېرې روغتیايي مرکزونو، ښوونځیو او بازارونو ته د نسي ولسوالۍ او په حګړه کې د نورو ښکېلو سیمو د خلکو لاسرسی محدود شوی دی.
د نسي ولسوالۍ یو تن اوسېدونکي ویلي دي: «موږ له کوره نه شو وتلی، اولادونه مو ښوونځي ته نه شي تلای. پښتون توکمه طالبانو ویلي، که څوک له کوره ووځي، وژل کېږي، پړه به یې پر خپله غاړه وي.»
د سرچینې په وینا، د خلکو په تګ راتګ د طالبانو محدودیت د دې لامل شوی، چې ښځې او ماشومان ونه شي کولی، روغتیايي مرکزونو ته مراجع وکړي او روغتیايي خدمات تر لاسه کړي او کورنۍ هم د خپلو ورځنیو اړتیاو لپاره بازار ته لاسرسی نه لري.
د سیمې اوسېدونکو هم ویلي، د نسي ولسوالۍ روغتیايي مرکزونه هم د پښتنو طالبانو په امر تش شوي او د دې ډلې ځواکونه، چې د جمعه خان فاتح سره په جګړه کې ټپیان شوي، په دې مرکز کې بستر او درملنه کېږي.
د سیمې د اوسېدونکو په وینا، د جمعه خان فاتح او پښتنو طالبانو تر منځ د جګړو له پیل راهیسې، د نسي ولسوالۍ او نورو سیمو خلک د نسي په روغتیايي مرکزونو کې له خدماتو محروم شوي دي.
یوې سرچینې ویلي دي: «په کلېنیک کې خپل ټپیان تداوي کوي. له طالبانو پرته نور څوک اجازه نه لري، چې دې مرکز ته ورشي. طالبانو ویلي که مړه کېدی هم د کلېنیک لور ته را نه شۍ.»
یوې بلې سرچینې هم ویلي، د جمعه خان فاتح او پښتنو طالبانو تر منځ د جګړې دوام، د نسي ولسوالۍ او نورو سیمو د خلکو د اندېښې لامل شوی دی.
هغه ویلي: «اوس خوراکي توکي لرو، خو که جګړه دوام وکړي، زموږ خوراکي توکي به خلاص شي. خلک به له سختو ستونزو سره مخ شي، ځکه طالبان هېچا ته اجازه د تګ راتګ اجازه نه ورکوي.»
د سیمو اوسېدونکو د جګړو د دوام او پراخېدو تر څنګ، په تګ راتګ له محدودیتونو او د مواصلاتي لارو په تړل کېدو هم اندېښنه ښودلې ده.
دوی ویلي، دې وضعیت د هغه کورنیو ژوند، چې ناروغ ماشومان، امیدواره ښخې او د درملنې وړ اړمن کسان لري، ستونزې لا ډېرې کړې دي.
د یادونې ده، چې د بدخشان نسي ولسوالۍ کې جګړې د چنګاښ میاشتې په وروستیو کې پیل شوې او د وسله والو طالبانو د ځواکونو او د ځايي قوماندان جمعه خان فاتح پورې د تړلو کسانو تر منځ په مخامخ نښتو اوښتې دي.
