د طالبانو بیا واک ته رسېدو له پنځمې کلیزې سره هممهاله، یو شمېر افغان وګړو په څو هېوادونو لکه، امریکا، کاناډ او ځینو نورو اروپايي هېوادونو کې له افغان ښځو او نجونو سره د پیوستون په موخه اعتراضي غوندې وکړې.
رخشانه: د امریکا متحده ایالاتو په واشنګټن ډي سي ښار کې مېشتو یو شمېر ا فعالانو، هنرمندانو او افغان وګړو، نن یکشنبې د زمري ۲۵ مه) په افغانستان کې «جنسیتي توپیر» د «ښځو په وړاندې محرومیت او تبعیض د یوه منظم» سیستم په توګه د جدي نیولو غوښتنه وکړه.
دوی په دې غونډه کې د افغان ښځو او نجونو وضعیت ته په اشارې و ویل، طالبانو هغوی له ژوند، زده کړو، اقتصاد، غونډو او عمومي فضا څخه حذب کړې دي.
واشنګټن ډي سي کې فعالانو او افغان وګړو ټینګار وکړ، چې نړیواله ټولنه باید په افغانستان کې د جنسیتي توپیر پای ته رسولو لپاره ځانګړي مشخص ګامونه پورته کړي.
دوی د طالبانو له لوري د ښځو او نجونو له بشري حقونو سرغړونو ته په اشارې ویلي «له دې ډلې سره هر ډول تعامل باید د بشري حقونو له معیارونو او د ښځو او نجونو د حقونو خوندیتوب سره مل وي.»
په دې غونډه کې افغان فعالانو له نړیوالې ټولنې او د بشري حقونو له بنسټونو وغوښتل، چې «د طالبانو د جرمونو د مستند کولو او له بشري حقونو د سرغړونو د عاملینو د ځواب ویونکو کولو لپاره» باید خپلواکه تحقیقاتي تګلارې رامنځ ته کړي.
په ورته وخت یو شمېر فعالانو او افغان وګړو په جینوا کې د ملګرو ملتونو د دفتر مخې ته اعتراضي غونډه وکړه تر د «افغان ښځو او نجونو غږ د نړیوالې ټولنې تر غوږه ورسوي.»
په دې اعتراضي غونډه کې ګډنوالو د طالبانو د سیاستونو او له انساني حقونو د هغوی د پراخه سرغړونو په وړاندې د خلکو په ځانګړې توګه د افغان ښځو او نجونو د مبارزو پر دوام ټینګار وکړ.
دوی له نړیوالې ټولنې وغوښتل، چې د افغانستان د خلکو په ځانګړې توګه د ښځو او نجونو وضعیت ته جدي پاملرنه وکړي.
دغه راز د کاناډا په تورینتو ښار کې یو شمېر افغان وګړو د طالبانو د واکمنۍ د پنځمې کلیزې په مناسبت په یوه اعتراضي غونډه کې ویلي، د ښځو او نجونو په وړاندې د طالبانو محدودیتونه، له بشري حقونو ښکاره سرغړونه ده.
تېره ورځ هم افغان وګړو، د مدني فعالانو او سیاسي فعالانو، د افغانستان او فنلنډ د ګوندونو د استازو په ګډون په هلسینکي کې د کامپي له هوايي ډګره د فلنډ د پارلمان په لور یوه اعتراضي غونډه وکړه.
تنظیموونکو د دې اعتراضي حرکت موخه، د عدالت لپاره د افغانانو د غوښتنو د غږ منعکس کول او د نړیوالې ټولنې او فنلنډ حکومت پام د افغانستان اوسني وضعیت ته اړول وبلل.
دغه پروګرام د کامپي په هوايي ډګر کې د یوې اعتراضي سینمايي نندارې په وړاندې کولو سره پیل او وروسته په کې یو شمېر سیاسي او مدني فعالانو، د فنلند او افغانستان د ګوندونو او بنسټونو استازو په کې ویناوې وکړې.
