ننګرهار کې ځايي سرچینې وايي، د دې ولایت په لعل پوره ولسوالۍ کې د یوه ماشوم هلک جسد له سیند څخه موندل شوی دی.
رخشانه: دوه ځايي سرچینو د هویت پټ ساتلو سره رخشانې رسنۍ ته ویلي، د دې ماشوم هلک جسد نن (یکشنبې د زمري ۲۵ مه) د لعل پورې ولسوالۍ په «ګرداوي» سیمه کې موندل شوی دی.
سرچینو ویلي، د دې ماشوم هلک جسد د سیمې د اوسېدونکو له خوا له سیند څخه موندل شوی دی.
د سرچینو په وینا، دا ماشوم شاوخوا ۱۱ کاله عمر لري او هویت یې معلوم نه دی.
د دې ماشوم چې کوم انځور رخشانې رسنۍ ته رالېږل شوی هغه په نیمه لوڅ ډول ښکاري.
د دې ماشوم جسد د ننګرهار په لعل پوره ولسوالۍ کې د طالبانو امنیه قوماندانۍ ته سپارل شوی، تر څو یې کورنۍ پیدا شي.
له بل لوري کونړ کې یوې بلې سرچینې ویلي، دوه ورځې وړاندې د دې ولایت د اسمار ولسوالۍ په «شنکر» کلي کې دوه ماشومان په سیند کې ډوب شوي او اوبو له ځان سره وړي دي.
د سرچینو په وینا، له دې ماشومانو د یوه جسد موندل شوی، خو د بل جسد لا هم ورک دی.
معلومه نه ده، چې د ننګرهار په لعل پوره ولسوالۍ کې د موندل شوي ماشوم جسد، د همغه ماشوم اړوند دی، چې د کونړ په سیند کې ډوب شوی و که نه.
په ننګرهار او کونړ ولایتونو کې ځايي طالب چارواکو تر اوسه په دې اړه څه نه دي ویلي.
