د ملګرو ملتونو د ښځو څانګې (UN Women) ویلي، د طالبانو د محدودیتونو له امله، شاوخوا ۸۰ سلنه ځوانې افغان ښځې، له تحصیل، کار او مسلکي زده کړو محرومې شوې دي.
رخشانه: دې بنسټ پرون ناوخته (سه شنبې د زمري ۲۷ مه) په خپله اېکس پاڼه د افغان ښځو او نجونو له زده کړو او کار څخه د ملاتړ غوښتنه کړې ده.
د ملګرو ملتونو د ښځو څانګې لیکلي، افغانستان کې له هرو لسو تنو ۹ تنه د نجونو د زده کړو ملاتړ کوي.
دې بنسټ لیکلي، افغان ښځې او نجونې غواړي، زده کړه وکړي، کار وکړي او د انتخاب حق ولري.
د ملګرو ملتونو د ښځو څانګې ټينګار کړی، چې د ښځو او نجونو باید د راتلونکې واک په خپل اختیار کې ولري.
طالبانو په تېرو پنځو کلونو کې پر ښځو او نجونو د محدودیتونو سربېره، هغوی له زده کړو هم محرومې کړې دي. دا مهال له شپږم ټولګي بره نجونې له زده کړې محرومې دي او ځوانې نجونې هم پوهنتون ته د تګ حق نه لري.
تېره اوونۍ د ملګرو ملتونو علمي، فرهنګي او ښوونیز سازمان (یونسکو) ویلي، د طالبانو په تېره پنځه کلنه واکمنۍ کې شاوخوا ۲.۴ میلیونه افغان نجونې له زده کړو بې برخې شوې دي.
د یونسکو په راپور کې راغلي، په هېواد کې د نجونو په زده کړو د طالبانو محدودیتونه، د ښوونیزو فرصتونو په پراختیا کې د کلونو پرمختګ درولی دی.
