د ملګرو ملتونو د خوړو نړیوال پروګرام (WFP) مشر جان آیلیف له افغانستان سره د بشردوستانه مرستو کمېدو د پایلو په اړه خبرداری ورکړی وايي، د مرستو کمېدو له امله په دغه هېواد کې ماشومان مري.
رخشانه: آیلیف په یوه مطب کې چې پرون چهارشنبې د (زمري ۲۸ مه) په برېتانوي «Prospect» مجله خپور شوی لیکلي «افغانستان له لوږې سره مخ دی او نړۍ خپلې سترګې تړلې دي.»
نوموړي په دې مطلب کې لیکلي، د ملګرو ملتونو د خوړو نړیوال پروګرام له څه مودې راهیسې د بودیجې د کمښت له امله اړ شوی، چې اړمن کسان تش لاس کورونو ته ولېږي.
آیلیف لیکلي: «په تېرو دریو میاشتو کې، زما ټیم اړ شو ټول هغه کسان چې د مرستو تر لاسه کولو لپاره زموږ مرکز ته مراجعه کوي، بېرته ولېږي، ځکه خواړه نه وو پاتې چې دوی ته مو ورکړی وای.»
ده ویلي، د خوړو نړیوال پروګرام هر کال د اړمنو ښځو ۱۴۰ زره بېړنۍ اړیکې تر لاسه کوي. د تېر کال له جون تر دسمبر پورې، افغان ښځو بېړنۍ اړیکې ۶۰ سلنه زیاتې شوې. ډېر ښځې [د بېوزلۍ له امله] د ځان وژنې فکر کوي.
د ملګرو ملتونو د خوړو نړیوال پروګرام مشر زیاته کړې، افغانستان کې یوې جوړې د بېوزلۍ له امله تصمیم نیولی وو، چې خپله ۱۲ کلنه لور یوه داسې سړي ته واده کړي، چې ۴۰ کلن او په نشه يي توکو اخته وو.
هغه لیکلي، یو بل سړي هم د بېوزلۍ او د خپلو اولادونو د ګډې مړولو لپاره یوه ګرده پلورلې وه.
د ملګرو ملتونو د خوړو نړیوال پروګرام مشر وايي، بېړنۍ بودیجې ته د دې بنسټ له شدید اړتیا سره سره، دا مهال د اړتیا وړ بودجې یوازې ۱۲ سلنه برابره شوې ده.
دی زیاتوي، د طالبانو او پاکستان تر منځ جګړې، اقلیمي بدلونونو او طبیعي پېښې د دې لامل شوې، چې ګڼ شمېر خلک د ملګرو ملتونو مرستو ته اړتیا پیدا کړي.
آیلیف په ۲۰۲۵ کې د طالبانو او پاکستان تر منځ د جګړو شدت او د تورخم دروازې تړل کېدو ته په اشارې وايي، د ملګرو ملتونو د ماشومانو لپاره د ۱۰ زره ټنه غذايی او ځانګړي خوراکي توکي، د پولو تر شا پاتي شول او دا بار د دریو میاشتو په ځنډ د ۹ هېوادونو له لارې افغانستان ته ورسېدل.
