د طلبانو مشر د پولیسو (شرطې) د قانون په توشېح کولو سره د دې ډلې کورنیو چارو وزارت ته ویلي دي، «د افغانستان د ننه هر ډول لاریونونه بند دي.»
رخشانه: دا قانون نن (شنبې د زمري ۳۱ مه) په پنځو څپرکیو او دري پنځوس مادو کې د دې ډلې د مشر له خوا توشېح او د عدلیې وزارت له ولري خپور شوی دی.
طالبانو مشر په دې سند کې ویلي، د دې ډلې پولیس ځواکونه موظف دي، چې د «مجرم او تورن کس د نیولو پر مهال» هغه ته زیان ونه رسوي.
د طالبانو مشر خپلو ځواکونو ته ویلي، د شرعي محکمې له حکم پرته حق نه لري، د تورن کس کور ته د ننه شي او هغه د نیولو پر مهال یې له وهلو ټکولو او ټپي کولو سره مخ کړي.
همدارنګه په دې سند کې راغلي، هېڅوک حق نه لري له سیاسي او جنايي زندانیانو سره بد چلند وکړي او د زندانیانو د «سزا پلي کولو» پر مهال ترې انځور واخلي.
د طالبانو مشر دا قانون پر داسې مهال خپروي، چې د دې ډلې ځواکونو په تېرو پنځو کلونو کې، په وار وار له معترضې ښځې او خپل مخالفین د نیولو پر مهال وهلي ټکولي او شکنجه کړي یې دي.
واک ته د طالبانو تر بیا رسېدو او په هېواد کې د ښځو او نجونو په وړاندې د محدودیتونو له لګولو وروسته، هغوی لارو واټونو ته راووتې، د دې محدودیتونو د لغوه کولو او خپلو لومړنیو حقونو ته د لاسرسي غوښتنه یې وکړه.
طالبانو په تېرو پنځو کلونو کې د ښځو اعتراضي غونډې وځپلې او د ښځو د حقونو لسګونه فعالانې یې ونیولې او په خپلو زندانونو کې یې شکنجه او له هغوی سره یې بد چلند وکړ.
همدارنګه دې ډلې له نیول شویو معترضو ښځو او خبریالانو «جبري اعتراف» هم واخیست او هغه یې په ټولنیزو شبکو او رسنیو کې خپاره کړل. رخشانې رسنۍ د طالبانو له خوا د ښځو د ځورونې، وهلو ټکولو، شکنجو او ناوړه چلند او د دې ډلې له خوا د نیول شویو ښځو سره د جنسي تېري څو پېښې مستندې کړې دي.
