افغانستان کې ملګرو ملتونو (UN) ویلي، د ښځو او نجونو پر کار او زده کړه د طالبانو محدودیتونه، د افغانستان د ټولنیز او اقتصادي پرمختګ مخه نیسي.
رخشانه: دې بنسټ نن (یکشنبې د وږي اوله) په خپله اېکس پاڼه لیکلي، له پنځو کلونو زیاته موده کېږي، چې افغان نجونې لا هم له خپلو اساسي حق زده کړو څخه محرومې دي.
ملګرو ملتونو لیکلي: «هره ورځ چې نجونې ښوونځي ته له تګ او ښځې د کار بازار څخه راګرځول کېږي، د افغانستان ټولنیز او اقتصادي پرمختګ هم ورسره له خنډونو سره مخ کېږي.»
ملګرو ملتونو افغانستان کې د نجونو په زده کړو او د ښځو پر کار د طالبانو د محدودیتونو لرې کېدو غوښتنه کړې ده.
تېره اوونۍ د ملګرو ملتونو د ښځو څانګې (UN Women) اعلان کړی وو، چې د افغان ښځو اتیا سلنه، د طالبانو د محدودیتونو له امله، له زده کړو، کار او مسلکي زده کړو محرومې دي.
له دې مخکې د ملګرو ملتونو عملي، کلتوري او ښوونیز سازمان (یونسکو) ویلي وو، د طالبانو په پنځه کلنه واکمنۍ کې شاوخوا ۲.۴ میلیونه نجونې له زده کړو محرومې شوې دي.
د یونسکو په راپور کې راغلي، هېواد کې د نجونو په زده کړو د طالبانو محدودیتونو، په ښوونیزه برخه کې د کلونو پراخو فرصتونو د پرمختګ مخنیوی کړی دی.
طالبانو په تېرو پنځو کلونو کې پر ښځو او نجونو د نورو محدودیتونو سربېره، هغوی له زده کړو او کار څخه هم محرومې کړې دي. دا مهال له شپږم ټولګي بره نجونې له زده کړو محرومې دي، ځوانې نجونې هم پوهنتون ته له تګ او له کوره د باندې د کار کولو څخه راګرځول شوې دي.
سره له دې، چې نړۍ په وار وار په ښځو او نجونو د دې لګول شویو محدودیتونو د لغوه کولو غوښتنه کړې، خو طالبانو په تېرو پنځو کلونو کې یو محدودیت هم نه دی لرې کړی، بلکې پر ښځو او نجونو یې تازه نور محدودیتونه هم لګولي دي.
