دایکنډي کې ځايي سرچینې وايي، د دې ولاتی میرامور ولسوالۍ کې یوه سړي خپله پخواني ښځه په ډوزو وژلې ده.
رخشانه: دوه باوري سرچینو رخشانې رسنۍ ته تایید کړه، چې دا پېښه پرون سهار، دوشنبې د (وږي ۲ مه) د میرامور ولسوالۍ په «اسکان» سیمه کې رامنځ ته شوې ده.
سرچینې وايي، دا ښځه شکیلا نومېده، ۲۵ کلنه وه او د خپل پخواني مېړه رحمت له خوا د (چره يي) بادي ټوپک په واسطه وژل شوې ده.
د سرچینو په وینا، دا ځوانه ښځه «د مهر اخیستو د دعوا» له امله، د خپل پخواني مېړه رحمت له خوا وژل شوې. له شکیلا دوه ۵ او ۷ کلن ماشومان پاتې دي.
سرچینو زیاته کړې، شکېلا تېره ورځ سهار له خپلې مور او ورور سره «د مهر د دعواې» د تعقیبولو لپاره د میرامور ولسوالۍ د مرکز په لور روان وو، چې د لارې په اوږدو کې رحمت دوی درولي او وروسته یې د شکېلا په لور ډزې کړې دي.
د سرچینو د معلوماتو پر بنسټ، رحمت د خپلې پخوانۍ ښځې تر وژل کېدو وروسته، له سیمې تېښته کړې او تر اوسه نه دی نیول شوی.
سرچینو ویلي، د شکيلا پخواني مېړه، څو کاله وړاندې امریکا ته کډوال شوی وو او هلته یې له مېشتېدنې وروسته، خپل ښځه له یوه بل پردي سړي سره په اړیکې لرلو تورنه او طلاق یې وکړی وو.
د سرچینو د خبرو له مخې، رحمت د شکیلا د طلاق دعوا د تعقیب لپاره خپله پخواني مېرمن افغانستان ته راوستې وه.
تر اوسه دایکنډي کې ځايي طالب چارواکو په دې اړه څه نه دي ویلي.
