د طالبانو د لوړو زده کړو وزارت په یوه تازه پرېکړه کې اعلان کړی، چې هېواد کې د خصوصي پوهنتونونو د حقوقو، سیاسي علومو او نړیوالو اړیکو پوهنځۍ باید منحل او د هغوی فعالیت په تدریجي ډول ودرول شي.
رخشانه: د طالبانو د لوړو زده کړو وزارت د مشرتابه شورا په یوه مصوبه کې ویلي، دا پرېکړه یې د زدکړیالانو د شمېر او کاري چاپېریال د کمېدو په خاطر کړې ده.
د دې مصوبې د منځپانګې له مخې، د دې پرېکړې پلي کېدل ښايي په لومړي پړاو کې په خصوصي پوهنتونو او وروسته په دولتي پوهنتونو کې هم پلی شي.
په مصوبه کې راغلي دي: «خصوصي پوهنځۍ باید د حقوقو، سیاسي علومو او نړیوالو اړیکې څانګې باید لغوه کړي.»
مصوبه کې راوړل شوي، د لوړو زده کړو وزارت باید د دې څانګو په بدل او د اصولو سره سم، نورې مناسبې څانګې وړاندیز کړي، چې زیات غوښتونکي ولري او کاري چاپېریال یې پراخه وي.
د طالبانو د لوړو زده کړو وزارت د مشرتابه شورا ویلي، ځای ناستې څانګې نه باید د طب او ستوماتولوژۍ څانګې ولري.
خو په دې خپاره شوي متن کې د دې پرېکړې د پلي کېدو کره نېټه، د اوسنیو زده کړیالانو د وضعیت، او د دې پوهنځیو د استادانو او کارکونکو د پرخلیک په اړه ډېر جزیات نه دي ورکړل شوي.
د دې پرېکړې پلي کول کولی شي، د حقوقو، سیاسي علومو او نړیوالو اړیکو د زده کړې پروسه او دغه راز د دې څانګو په زده کړیالانو او استادانو مستقیم اغېز ولري.
طالبانو په تېرو پنځو کلونو کې د دولتي او خصوصي پوهنتونو په زده کړیالانو ګڼل محدودیتونه لګولي دي. دا مهال د ږیرې پرېښودل او د کمیس او پرتوګ اغوستل په ټولو دولتي او خصوصي پوهنتونونو کې الزامي شوي دي.
دې ډلې په هېواد کې د نوي ښوونیز کال په پیل سره، په یو شمېر ولایتونو کې د دولتي پوهنتونونو زده کړیالان اړ کړي، هغه ژمن لیکونه لاسلیک کړي، چې له «حنفي مذهب» څخه پیروي کوي.
په دې ژمن لیکونو کې راغلي، زده کړیالان باید «شرعي اصولو» او «اسلامي لارښوونو» ته ژمن وي او د طالبانو «اسلامي امارت» باید یو «شرعي نظام» وبولي.
