بدخشان کې ځايي طالب چارواکي وايي، یوه «لېوني» سپي د دې ولایت مرکز فیض آباد ښار کې ۱۶ ښځې او ماشومان او درې بوده څاروي داړلي دي.
رخشانه: بدخشان کې د طالبانو د کرنۍ ریاست د پلان او پروګرامونو د همغږۍ مدیر کیکاوس تکساري ویلي، دا پېښه پرون سه شنبې (د وږي ۳ مه) د فیض آباد ښار د اوومې امنیتي حوزې اړون «کري» سیمه کې رامنځ ته شوې ده.
د تکساري په وینا، دا په «هاري» ناروغۍ اخته شکمن سپی وو او د سیمې په اوسېدونکو یې حمله کړې، چې په ترڅ کې یې ۱۶ ښځې او ماشومان او درې سره څاروي ټپیان شوي دي.
هغه ویلي، په دې پېښه کې زیانمن شوي کسان د واکسین تر لاسه کولو لپاره روغتون ته مراجعه کړې ده.
د دې کسانو د روغتیايي وضعیت په اړه جزیات په لاس کې نشته.
کیکاوس تکساري ویلي، دا سپی د سیمې د خلکو له خوا له منځه وړل شوی دی.
هاري یا لېونتوب یوه ویروسي ناروغي ده، چې معمولآ پر دې اخته حیوان د داړلو یا د هغې د ځګونو سره د تماس یا نښلېدو له لارې لېږدول کېږي او د دې ناروغۍ د نښو څرګندېدو په صورت کې ښايي د مړینې لامل شي.
څه موده وړاندې هم سمنګان ولایت کې د ښځو او ماشومانو په ګډون له ۱۹ زیات کسان د یوه درنده وحشي حیوان په برید کې ټپیان شوي وو.
