د بشري حقونو فعالانو او ۱۴۰ مدني بنسټونو او د ښځو اعتراضي غورځنګونو د امریکا د کانګرېس غړې عایشه وهاب په هغه څرګندونو چې له طالبانو سره د واشنګټن اړیکې یې اړتیا وبلله، اندېښنه وښوده وايي، «له طالبانو سره سیاسي تعامل نه باید د هغوی د عادي کولو او دې ډلې ته د مشروعیت ورکولو» باندې بدل شي.
رخشانه: د بشري حقونو فعالانو او ۱۴۰ مدني بنسټونو او د ښځو اعتراضي غورځنګونو نن (پنشنبې د وږي ۵ مه) په یوه پرانستې لیک کې عایشه وهاب ته لیکلي دي «د افغانستان د خلکو ارادې، حقونو او له یوه سیاسي دیموکراتیک پروسې ملاتړ ته» درناوی وکړه.
د بشري حقونو فعالانو او معترضو ښځو په دې لیک کې لیکلي دي، د امریکا د کانګرس د غړې په توګه د عایشه وهاب ټاکنه امیدواره کوونکې وه، چې د هغې مقام او غږ به «په سیاسي او نړیوالو ناستو کې د افغانستان د خلکو د اندېښنو، غوښتنو او واقعیتونو انعکاس کوونکې وي.»
په دې لیک کې راغلي، چې: «موږ پر دې باور لرو، چې په اوسنیو شرایطو کې، له خلکو سره په بشري مرستو او له طالبانو سره په هر ډول سیاسي تعامل کې بشپړه بریدونه وي او د میلیونونه وګړو لپاره د اقتصادي او حیاتي کړاونو د کمولو هڅې اړینې دي.»
د بشري حقونو فعالانو او معترضو ښځو ویلي، له طالبانو سره سیاسي تعامل نه باید د هغه رژیم د عادي کولو، سیاسي پیاوړتیا یا مشروعیت ورکولو وسیله وګرځي، چې په سیستماتیک ډول یې د ټولنې د یوې لویې برخې، په ځانګړې توګه د ښځو او نجونو اساسي حقونه ترې اخیستي دي.
دوی ټینګار کړی، چې «د هېواد سیاسي راتلونکې نه باید د طالبانو د نظامي قدرت پر بنسټ» وټاکل شي او د افغانستان خلک حق لري، چې په یوه مشروع او دیموکراتیکه پروسه کې د خپلې راتلونکې په اړه پرېکړه وکړي.
هغوی په دې لیک کې لیکي دي «هر ډول سیاسي پروسه باید خپل مشروعیت د خلکو له ارادې، قانون له حاکمیت او بشري حقونو واخلي» او طالبان نه باید د افغانستان د خلکو د استازو په توګه ومنل شي.
د بشري حقونو فعالانو او معترضو ښځو ویلي دي «د ښځو او هېوادوالو حقونه نه باید د سیاسي ملاحظاتو قرباني شي» او پر ښځو او نجونو د طالبانو محدودیتونه، او د مدني او سیاسي آزادیو ځپل دا ایجابوي، چې له طالبانو سره هر ډول اړیکې عادي کول باید په پرېکنده توګه رد شي.
د دوی په باور، د افغان ښځو عدالت غوښتونکې مبارزو ته باید درناوی وشي او «د افغانستان راتلونکې د ښځو، مدني فعالانو، د بشري حقونو د مدافعینو او طالبانو د مخالفینو د غږونو اورېدو پرته» نه شي جوړېدای.
د بشري حقونو فعالانو او معترضو ښځو له عایشه وهاب نه غوښتي، چې د خلکو د ارادې پر بنسټ د یوې سیاسي دیموکراتیکې پروسې ملاتړ وکړي او طالبان د افغانستان د خلکو د استازو په توګه په رسمیت ونه پېژني.
همدارنګه دوی له عایشه وهاب غوښتي، چې په ټولو نړیوالو معادلاتو کې د آزادیو له حقونو، د ښځو او ځوانانو له فعال حضور او د افغانستان مدني ټولنې څخه دفاع وکړي او د افغانستان د خلکو روا غوښتنو ته درناوی وکړي.
عایشه وهاب چې تازه یې د امریکا استازو جرګې (کانګرس) ته لار کړې، په خپلو لومړنیو رسمي څرګندونو کې یې د طالبانو او امریکا تر منځ د رسمي اړیکو ټینګولو او ساتلو غوښتنه وکړه.
دې څرګندونو د بشري او ښځو د حقونو د فعالانو پراخ غبرګونونه راپارولي دي. فعالانو د عایشه وهاب دریځ کلک غندلی او هغه یې د بشري حقونو، عدالت او د جنسیتي برابرۍ لپاره د مبارزې له اصولو سره په ټکر کې بللی دی.
دوی ټینګار کړی، دا ډول څرګندونې د دې پر ځای چې د افغان ښځو د حقونو او آزادۍ ملاتړ وکړي، د ښځو په وړاندې د طالبانو د محدودیتونو په عادي کولو کې مرسته کوي.
