د «افغان ښځو د حرکت شبکې» غړو د امریکا د استازو جرګې د افغان توکمه استازې عایشه وهاب دا دریځ، چې واشنګټن دې له طالبانو سره تعامل خوندي وساتي، په کلکه غندلی دی.
رخشانه: د دې اعتراضي غورځنګ غړو په یوه پرېکړه لیک کې لیکلي، د عایشه وهاب دریځ، د میلیونونه افغان ښځو کړاو او مبارزې ته ښکاره بې پروايي ده.
د «افغان ښځو د حرکت شبکې» د امریکا متحده ایالاتو او طالبانو ادارې تر منځ د رسمي اړیکو ټينګښت په سختو ټکو غندلی دی.
د دې اعتراضي غورځنګ په پرېکړه لیک کې راغلي، څنګه کولی شو د واشنګټن او طالبانو تر منځ د اړیکو څخه ملاتړ وشي، چې ښځې یې تر خپلو ټولو لومړنیو حقونو محرومې کړې دي.
د دې اعتراضي غورځنګ غړو عایشه وهاب ته په خطاب کې ویلي، د یوې سیاسي استازې په توګه څنګه کولی شي، د هغې ډلې سره له رسمي اړیکې ملاتړ وکړې، چې میلیونونه ښځې یې څنډې ته کړې دي.
معترضو ښځو ویلي دي: «موږ دا نه منو چې څوک دې یوازې د افغان توب په دلیل ځان د افغانانو ویاند وبولي او بیا د امریکا پلازمېنه کې، د افغان ښځو له ځپوونکو سره د رسمي اړیکې په اړه دریځ ونیسي.»
دوی پر ښخو د طالبانو محدودیتونو ته په اشارې، عایشه وهاب ته په خطاب کې ویلي دي: «تاسو د کلمو په بدلولو او د رسمي اړیکو د سرلیک په کارولو سره د ښځو د ځپلو حقیقت نه شۍ پټولی.»
د افغان ښځو د حرکت شبکې ټینګار کړی، چې «له طالبانو سره رسمي اړیکې، په داسې حال کې، چې افغان ښځې د یوه ځپوونکي نظام په اسارت کې ژوند کوي، د ځپنې له عادي کولو او دې ډلې ته د سیاسي انعام ورکولو پرته بل څه نه دي.»
د دې غورځنګ غړو ویلي، چا ته اجازه نه ورکوي، چې د افغان ښځو کړاو «کوچینی» د دوی مقاومت «بې ارزښته» او طالبان «د نړیوالو اړیکو شریکان» معرفي کړي.
معترضو ښځو ټینګار کړی، چې عایشه وهاب حق نه لري، خپل سیاسي نظر د افغان ښځو په نوم وپلوري.
دوی ویلي، د عایشه وهاب دریځ په پرېکنده توګه ردوي او د طالبانو ته د مشروعیت ورکولو او د دوی د عادي کولو د هېڅ ډول هڅو په وړاندې به چوپتیا غوره نه کړي.
افغان توکمه ښځې عایشه وهاب چې تازه یې د امریکا استازو جرګې (کانګرس) ته لار موندلې، په خپلو لومړنیو رسمي څرګندونو کې، د امریکا او طالبانو تر منځ د رسمي اړیکو ټینګولو او ساتلو غوښتنه کړې.
د نوموړې دې خبرو د بشري او ښځو د حقونو د فعالانو پراخ غبرګونونه راپارولي دي. فعالانو د عایشه وهاب دریځ غندلی او هغه یې د بشري حقونو له اصولو، عدالت او د جنسیتي برابرۍ لپاره د مبارزې سره په ټکر کې بللي دي.
دوی ټینګار کړی، دا ډول څرګندونې د دې پر ځای چې د افغان ښځو د حقونو او آزادۍ ملاتړ وکړي، د ښځو په وړاندې د طالبانو د محدودیتونو په عادي کولو کې مرسته کوي.
