هرات کې سیمه ییزې سرچینې وايي، د دې ولایت په مرکز ښار کې، یوه ماشومه نجلۍ په مرموز ډول وژل شوې او جسد یې د یوې « بوجۍ» له منځه موندل شوی دی.
رخشانه: هرات ښار کې دوو سرچینو رخشانې رسنۍ ته ویلي، د دې ماشومې نجلۍ جسد پرون سهار (شنبې د وږي ۷ مه) د هرات ښار د دولسمې ناحیې اړوند «جوی نو» سیمه کې موندل شوی دی.
د سرچینو په وینا، دا ماشومه نجلۍ مریم نومېده او شپږ کلنه وه.
سرچینو زیاته کړې، چې نوموړې د جمعې په ورځ د ۱۸ مې ناحیې اړوند «عمه سکینه» سیمه کې خپل کور ته نېږدې ورکه شوې وه.
د سرچینو په وینا، د دې ماشومې نجلۍ جسد پرون سهار (شنبې د وږي ۷ مه) د سیمې د اوسېدونکو له خوا په یوه بوجۍ کې موندل شوی دی.
سرچینو تایید کړه، چې د نجلۍ په ستوني کې د خفه کولو نښې درلودې.
تر اوسه معلومه نه ده، چې دا ماشومه نجلۍ د چا له خوا او په کوم هدف وژل شوې ده.
هرات کې طالب امنیتي چارواکو هم تر اوسه په دې اړه څه نه دي ویلي.
د راپورونو له مخې، پر هېواد د طالبانو په تېره پنځه کلنه واکمنۍ کې، جنايي او مرموزې پېښې، په ځانګړې توګه د ښځو مرموزې وژنې بې مخینې زیاتې شوې دي.
