یو شمېر افغان سیاسي او ټولنیزو فعالانو، د ښځو او بشري حقونو فعالانو د «ملي خبرو اترو» ناسته کې ویلي، افغانستان کې د واک انحصار او له بشري حقونو سرغړونې د منلو وړ نه دي.
رخشانه: د ملي خبرو اترو شپاړسمه غونډه پرون شنبې د وږي (۷ مه) په واشنګټن ډي سي کې د لسګونو افغانانو په ګډون جوړه شوېوه.
د دې ناستې ګډونوالو ویلي، «افغانستان په یوه سیاسي بن بست کې دی، په هېواد کې ریښتینې سوله، خپلواکي، هوساینه او امید شتون نه لري.»
دوی په دې ناسته کې د افغانستان د کړکېچ د حل لپاره په لار موندلو او پر افغان وګړو په ځانګړې توګه پر ښځو او نجونو د طالبانو د محدودیتونو په لغوه کولو ټينګار وکړ.
فعالانو و ویل، په افغانستان کې د طالبانو له لوري د واک انحصار او له بشري حقونو سرغړونې هېڅ د منلو وړ نه دي.
هغوی د طالبانو له لوري د واک د انحصار پر دوام، د اساسي قانون په نشتوالي، د مشروع نظام نه شتون او له بشري حقونو په سرغړونو اندېښنه وښوده ویې ویل، دا موضوعات به جدي بحرانونو ته لار هواره کړي.
د دې ناستې د ګډونوالو په وینا، «افغانستان یوې ملي، رڼې او د خلکو په خوښه پروسې ته اړتیا لري، چې په هغې کې ټولې ډلې، قومونه، ښځې، ځوانان او مخور رول ولري.»
دوی ویلي، د افغانستان خلک باید د بشري حقونو د سرغړونو، تبعیض، انحصار او بې عدالتۍ په وړاندې غلي نه شي او د بدلون لپاره له مدني او سوله ییزه لارو هڅه وکړي.
فعالانو ټيڼګار وکړ، چې د خلکو فشارونه، عامه پوهاوی او ملي انسجام کولی شي، په افغانستان کې مثبتو اصلاحاتو او بدلونونو ته لار هواره کړي.
دا غونډه د هغې پروسې پر دوام ده، چې له ۲۰۲۵ کال راهیسې پیل شوې او تر اوسه، د اروپا، شمالي امریکا او استرالیا په بېلا بېلو ښارونو کې جوړې شوې دي.
