نورستان کې ځايي طالب چارواکي وايي، د دې ولایت وانټ وایګل ولسوالۍ کې د راوتلو سېلابونو له امله، څلور کورونه نړیدلي او د یوه ماشوم او دوو ښځو جسدونه موندل شوي دي.
رخشانه: نورستان کې د طالبانو د امنیه قوماندانۍ ویاند محمد حسین ثاقب ویلي، سېلابونه پرون ماښام (دوشنبې د وږي ۹ مه) د وانټ وایګل ولسوالۍ په «اشو» کلي کې راوتلي دي.
د ثاقب په وینا، په دې سیمه کې د سختو بارانونو او سېلابونو له امله، څلور کورونه ویجاړ شوي او د یوه ماشوم او دوو ښځو په ګډون د دریو تنو جسدونه موندل شوي دي.
ثاقب زیاته کړې، د پاتې کسانو د ژغورنې لپاره پلټونکي عملیات روان دي.
نورستان کې د طالبانو د امنیه قوماندانۍ ویاند ویلي، په وانټ وایګل ولسوالۍ کې د سېلابونو په ترڅ کې لسګونه جرېبه کرنیزه ځمکه ویجاړه شوې ده.
د هغه په وینا تالندې او برېښنا له امله د دې ولایت د مرکز په لوړه سیمه «چاتراس» کې دوه تنه ټپیان شوي او ۲۲ سره څاروي له منځه تللي دي.
د نورستان ولایت مرکز پارون ښار د روان لمریز کال د چنګاښ میاشتې په وروستیو کې د خونړیو سېلابونو شاهد وو.
د دې ولایت مرکز پارون ښار کې د سېلابونو له امله لږ تر لږه ۳۰ تنو ژوند له لاسه ورکړی وو، ۲۴ تنه ټپیان او یو شمېر نور لادرکه شوي وو.
