افغانستان کې د ملګرو ملتونو د ښځو څانګې استازې سوزان فرګوسن، د دې سازمان دفترونو ته د ملګرو ملتونو د کارکوونکو د لاسرسي محدودیت د یو کلن کېدو پر مهال ویلي، د ښځینه کارکوونکو له شتون پرته، نه شي کولی افغان ښځو او نجونو ته د دوی له کلتور او شرایطو سره سمې مرستې وړاندې کړي.
رخشانه: هغې نن (دوشنبې د وږي ۱۶ مه) په یوه بیانیه کې ویلي، د ملګرو ملتونو اړوند دفترونو ته د ښځینه کارکوونکو محدودیت، د ملګرو ملتونو په منشور کې د درج شویو بشري حقونو او برابرۍ د بنسټیزو اصولو تر پښو لاندې کول دي.
فرګوسن وايي، د نړۍ په هېڅ ځای کې ښځې د دوی د جنسیت په دلیل د ملګرو ملتونو مرکزونو ته له ننوتو نه راګرځول کېږي او دا اقدام د ملګرو ملتونو په ۸۰ کلن تاریخ کې بې مخینې دی.
د هغې په وینا، د ملګرو ملتونو پر ښځینه کارکوونکو د طالبانو دا محدودیتونه، په افغانستان کې د دې سازمان او د هغوی د شریکانو فعالیتونه کمزوري کوي او ښځو او نجونو او د هغوی کورنیو ته لاسرسی او د هغوی د اړتیا وړ مرستو د برابرولو توان کموي.
افغانستان کې د ملګرو ملتونو د ښځو څانګې استازې ویلي، په تېر یوه کال کې د دې سازمان افغان ښځینه کارکوونکو د خپلو اساسي دندو تر سره کولو ته دوام ورکړی دی.
هغې ټینګار کړی، چې دغو کارکوونکو د ټولنې په کچه د ښځو د سازمانونو ملاتړ کړی، د ښځو سره یې د ژوند فرصتونو ته د لاسرسي او د اقلیمي بدلون په وړاندې د انعطاف زیاتولو کې مرسته کړې ده.
مېرمن فرکوسن وايي، د ملګرو ملتونو دفترونو ته د ښځینه کارکوونکو د لاسرسي بندیز د افغان ښځو د زده کړو، کارموندنې، تګ راتګ او په عامه ژوند کې د ګډون په اړه د یو لړ نورو محدودیتونو په توګه وضع شوی دی.
نوموړې زیاته کړې، د دې محدودیتونو ټولګه نه یوازې په اړمنو افغانانو، بلکې پر کورنیو، ټولنو او د هېواد پر اقتصادي غوړېدا هم اغېز کوي.
سوزان فرګوس ویلي دي: «ملګري ملتونه د افغان ښځینه کارکوونکو له شتون پرته، نه شي کولی افغان ښځو او نجونو ته د دوی له کلتور او شرایطو سره سمې مرستې وړاندې کړي.»
د دې په وینا، په افغانستان کې باید د ښځو له خوا د ښځو لپاره مرستې وشي. د ملګرو ملتونو د ماموریت تر سره کولو لپاره، د افغان ښځینه کارکوونکو بشپړ ، برابر او له خنډ پرته ګډون اړین دی.
فرګوسن له طالبانو غوښتي، چې د دې بنسټ اړوند دفترونو ته د ملګرو ملتونو د ښځینه کارکوونکو د لاسرسي محدودیت لرې کړي.
د ملګرو ملتونو د ښځو څانګې اجراييوي مشرې سیما باهوس هم د ملګرو ملتونو پر ښځینه کارکوونکو د لګول شوي محدودیت یو کلن کېدو ته په اشارې د دې محدودیت د لغوه کولو غوښتنه کړې ده.
هغې ویلي، طالبانو د ښځو پر زده کړوو کار او په عمومي ژوند کې د ګډون محدودیتونه نه یوازې لغوه کړي نه دي، بلکې لا یې سخت کړي دي.
د ملګرو ملتونو د ښځو څانګې اجرايیوي مشرې د افغان ښځو او نجونو پر حقونو او اساسي خپلواکیو د طالبانو محدودیتونو ته په اشارې زیاته کړې، چې دا وضعیت دوام نه شي کولی.
