د افغانستان د خبریالانو مرکز(AFJC) ویلي، د طالبانو د عدلیې وزارت ځواکونو، کابل کې د راه فراد خصوصي تلوېزیون او صدای اصلاح راډیو دفترونه وتړل او د دې دوو رسنیو فعالیت یې بند کړ.
رخشانه: د افغانستان د خبریالانو مرکز وايي، د راه فراد تلوېزیون دفتر پرون یکشنبې د (وږي ۱۵ مه) او د صدای اصلاح راډیو دفتر لس ورځې وړاندې مهر ولاک شوی دی.
دې مرکز لیکلي، طالب ځواکونه پرون له غرمې وروسته شاوخوا یوه بجه، د کابل ښار د دریمې ناحیې اړوند «سر کاریز» سیمه کې د راه فردا خصوصي تلوېزیون په دفتر یرغل وکړ او هغه ځای یې مهر و لاک کړ.
د افغانستان د خبریالانو مرکز ویلي، طالب ځواکونو د دې رسنۍ نوی د امتیاز خاوند سلمان اخلاقي ونیوه او له ځان سره یې یووړ.
دغه راز طالبانو د یوه قومي مخور دفتر هم چې د راه فردا خصوصي تلوېزیون تر څنګ یې موقعیت درلود تړلی او هلته شته کسان یې نیولي او له ځان سره یې وړي دي.
طالبانو ویلي، د راه فردا تلوېزیون او قومي مخور د دفتر ودانۍ، د افغانستان د حزب وحدت ګوند د مشر محمد محقق اړوند دي او په همدې خاطر دوی دغه رسنۍ او د قومي مخور دفتر تړلي او د دې رسنۍ د امتیاز خاوند او قومي مخور یې هم نیولي دي.
دې ډلې د تېر کال د کب په ۹مه نېټه هم د راه فردا خصوصي تلوېزیون دفتر تړلی او د دې رسنۍ فعالیت یې بند کړی وو.
خو دا رسنۍ له څو میاشتو فعالیت درېدو وروسته، د روان لمریز کال په اوړي کې د امتیاز د نوي خاوند په راتګ سره بېرته خپل فعالیت پیل کړ.
د افغانستان د خبریالانو مرکز د راه فردا تلوېزیون د مهر و لاک د غندلو تر څنګ، له طالبانو غوښتي، چې د دې رسنۍ د امتیاز خاوند له قید و شرط پرته خوشی کړي.
دې مرکز په یوه بله اعلامیه کې لیکلي، د طالبانو د عدلیې وزیر اړونده ځواکونو، کابل کې د صدای اصلاح راډیو دفتر هم تړلی او د دې رسنۍ خپرونې یې بندې کړې دي.
د دې خصوصي رسنۍ دفتر د روان لومریز کال د زمري میاشتې په ۵ مه نېټه د طالبانو د عدلیې وزیر اړونده ځواکونو له خوا مهر و لاک شوی دی.
د افغانستان د خبریالانو مرکز ویلي، د طالبانو عدالیې وزارت د دې خصوصي رسنۍ دفتر له «جمعیت اصلاح او د افغانستان ټولنیزې پراختیا ټولنې» سره د تړاو په دلیل تړلی دی.
د دې مرکز په وینا، د صدای اصلاح راډیو له ۱۳۹۷ راهیسې نویو مالکینو ته سپارل شوې او د «افغانستان د جمعیت اصلاح او ټولنیزې پراختیا ټولنې» پورې اړه نه لري.
د افغانستان د خبریالانو مرکز د راه فردا خصوصي تلوېزیون او صدای اصلاح راډیو په وړاندې د طالبانو د عدلیې وزارت اقدام غندلی او د دې دوو رسنیو د دفترونو د پرانستو غوښتنه یې کړې ده.
طالبانو په تېرو څه باندې پنځو کلونو کې، په هېواد کې په رسنیو بې شمېره محدودیتونه لګولي دي. د دې محدودیتونو په ترڅ کې لسګونه غږیزې، تصویري او چاپي رسنۍ له فعالیت څخه پاتې شوې دي.
