د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنټ، د ښځو او نجونو په وړاندې د طالبانو محدودیتونو ته په اشارې، له ملګرو ملتونو غوښتي، چې د هغوی له حقونو په کلماتو نه بلکې په عمل کې دفاع وکړي.
رخشانه: بنټ دغه څرګندونې نن (دوشنبې د مرغومي ۱۶ مه) د ملګرو ملتونو د بشري حقونو شورا په غونډه کې وکړې.
د افغانستان د بشري حقونو لپاره د ملګرو ملتونو ځانګړي راپور ورکوونکي په دې ناسته کې ویلي، طالبان په افغانستان کې د بشري حقونو د وضعیت په اړه، له نړیوالو سرو کرښو پښه اړوي.
هغه، په هېواد کې د ښځو او نجونو په وړاندې د طالبانو سختو له تبعیضه ډکو محدودیتونو ته اشاره وکړه او د هغوی له حقونو دفاع ته یې ژمنتیا وښوده.
همدارنګه بنټ د ملګرو ملتونو له غړو هېوادونو او د دې سازمان د بشري حقونو د شورا له غړو غوښتي، چې د شعار ورکولو پر ځای دې، په عملي توګه د افغان ښځو او نجونو له حقونو دفاع وکړي.
نوموړي په دې غونډه کې ویلي، د طالبانو محدودیتونه د دې لامل شوي، چې په افغانستان کې د ماشومانو او نویو ځوانانو ژوند او ماشومتوب، په وېره، محرومیت او ناهیلۍ کې تېر شي.
بنټ پر دوام زیاته کړې، چې د طالبانو تر واک لاندې افغانستان کې یې د نجونو د ځان وژنې په اړه ګڼ شمېر راپورونه اورېدلي دي.
هغه د طالبانو د مشر له خوا تازه توشېح شویو فرمانونو ته په اشارې ویلي، دغې ډلې د دې فرمانونو او نویو حکمونو په صادرولو سره، د ماشومانو حقونه مخکې له مخکې کمزوري کړي دي.
د افغانستان د بشري حقونو لپاره د ملګرو ملتونو ځانګړي راپور ورکوونکي ویلي، له خلکو سره د طالب ځواکونو د تاوتریخولي، جسمي او رواني ناوړه چلند څخه ټکان خوري.
نوموړي د طالبانو د «زوجینو جلاوالي اصولنامې» توشېح ته په اشاره ویلي، دې سند د ماشومتوب ودونه په رسمیت پېژندلي دي.
