د افغانستان د خبریالانو مرکز (AFJC) وايي، د طالبانو د امربالمعروف ځواکونو خوس کې دوولس تنه خبریالان د کتابونو د یوه نندارتون د خبري پوښښ پر مهال په «سپکوونکې توګه» نیولي او کمرې یې ترې ضبط کړې دي.
رخشانه: دې بنسټ نن (سه شنبې د وږي ۱۷ مه) په اعلامیه کې دا اقدام په کلکه غندلی او هغه یې د انساني کرامت او د خبریالۍ د مسلک د حقونو سره په ټکر کې بللی دی.
د افغانستان د خبریالانو مرکز لیکلي دي، دا پېښه نن سهار ۹:۳۰ بجې د خوست ښار په دویمه ناحیه کې د کتابونو د یوه ورځني نندارتونو د خبري پوښښ پر مهال رامنځ ته شوې ده.
دې مرکز زیاته کړې، خبریالان د انځور اخیستو او له نندارچیانو سره د خبرو اترو په حال کې وو، چې د طالبانو د امربالمعروف ځواکونو د دوی د کار مخه ونیوه.
د افغان خبریالانو د مرکز په وینا، د طالبانو د امربالمعروف ځواکونو له خبریالانو سره له سپکاوي ډک چلند وکړ، هغوی یې ونیول او کمرې یې ترې واخیستې.
د افغانستان د خبریالانو مرکز ویلي، د خبریالانو کمرو د نیولو په څو ساعته تېرېدو سره، د طالبانو د امربالمعروف ځواکونو لا هم د خبریالانو وسایل نه دي ورکړي.
دا مرکز وايي، د طالبانو د امربالمعروف ځواکونو له دې امله چې په خوست کې «د ساه کښو انځور خپرول منع کړای شوی دي» د خبریالانو کمرې ضبط کړې دي.
د افغانستان د خبریالانو مرکز له طالبانو غوښتي، چې خبریالانو ته د کمرو د ورکړې تر څنګ، په بېړنۍ توګه له هغوی سره بد چلند او سپکاوی پای ته ورسوي او اجازه ورکړي، چې خبریالان خپل مسلکي کار له وېرې په تشه فضا کې تر سره کړي.
د طالبانو له لوري په رسنیو کې د ساه کښو انخور نه خپرولو بندیز د ۱۴۰۳ کال د زمري له میاشتې پلی شوی او تر اوسه د هېواد له ۲۳ ولایتونو په ۲۵ هغو کې پلی شوی دی.
