د بښنې نړیوال سازمان آسیايي څانګې، د پاکستان د طبي شورا د دې پرېکړې په غبرګون کې، چې د طب او ستوماتولوژۍ زده کوونکې نجونې به د طالبانو ترواک لاندې افغانستان ته وباسي ویلي، دا پرېکړه د محصلو نجونو لپاره جدي پایلې لري.
رخشانه: دې سازمان په یوه اعلامیه کې لیکلي، د پاکستان د طبي شورا دا پرېکړه په ښکاره ډول له «تبیعض څخه ډکه او خپل سرې» ده.
د بښنې نړیوال سازمان د آسیا څانګې ویلي، د دې پرېکړې پایلې به په زده کوونکو نجونو خورا سختې وي، ځکه ډېری د هغو، په افغانستان کې لوړو زده کړو ته له لاسرسي محرومې شوې دي.
یاد سازمان زیاته کړې، افغان زده کوونکې نجونې به له پاکستان څخه په ایستلو سره، د زده کړو او خپل مسلکي فعالیت د دوام لپاره ډېر لږ پاتې فرصت هم له لاسه ورکړي.
د بښنې نړیوال سازمان زیاته کړې، ډېری له دې زده کوونکو زیات وخت د طب په څانګه کې زده کړې کړې، خو تحصیلات یې په ناڅاپي او د توجیه نه وړ ډول سره پای ته رسېدلې او دوی په بل ځای کې د خپلو زده کړو د بیا پیل لپاره لږ تمه لري.
دې سازمان ویلي، د پاکستان دولت باید د نړیوالو بشري حقونو له قوانینو سره سم، موظف دی، چې د زده کړې حق له تبعیض پرته د ملیت پر اساس رعایت کړي.
د بښنې نړیوال سازمان د پاکستان له دولت نه غوښتي، چې یوه انساني او عملي حل لاره ونیسي، چې افغان زده کوونکو، له هغې جملې ښځو او نجونو ته اجازه ورکړي، چې په دې هېواد کې خپلې زده کړې بشپړې کړي.
د پاکستان طبي شورا تازه امر کړی، ټول هغه افغان زده کوونکي، چې په پاکستان کې د طب او ستوماتولوژۍ په څانګو کې په زده کړو بوخت دي، باید دا هېواد پرېږدي. دغه راز دې شورا د نویو افغان محصلینو جذب هم بند کړی دی.
دې شورا افغان محصلینو ته ویلي، دا پرېکړه یې له دې امله کړې، چې طالبان د پاکستان له دولت سره په جګړه کې دي.
د پاکستان د طبي شورا له خوا د طب او ستوماتولوژۍ د افغان محصلینو ایستل، پراخ غبرګونونه له ځان سره لري.
