ننګرهار کې ځايي سرچینې وايي، دې ولایت کې د دوه جلا پېښو په ترڅ کې یو ماشوم ژوند له لاسه ورکړی او درې نور ټپیان شوي دي.
رخشانه: ننګرهار کې دوه ځايي سرچینو ویلي، د دې ولایت خوګیاڼو ولسوالۍ کې د یوې ګاز ډبې د چاودنې له امله دوه ماشومان ټپیان شوي دي.
د سرچینو په وینا، دا پېښه پرون چهارشنبې د (وږي ۱۸ مه) د خوګیاڼو ولسوالۍ «چمتله» سیمه کې رامنځ ته شوې ده.
سرچینو زیاته کړې، دا ماشومان له ځنډ پرته د سیمې د اوسېدونکو له خوا روغتیايي مرکز ته لېږدول شوي او اوس یې روغتیايي حالت د ډاډ وړ دی.
د ننګرهار مرکز جلال آباد ښار کې یوې بلې سرچینې ویلي، دوه ماشومان په سیند ډوب شوي، چې یوه یې ژوند له لاسه ورکړی او یو بل ژغورل شوی دی.
د سرچینې په وینا، دا پېښه د چهارشنبې (وږي ۱۸ مې) په ماښام د جلال آباد ښار په درېیمه ناحیه کې رامنځ ته شوې ده.
سرچینې زیاته کړې، دا ماشومان شاوخوا ۷ او ۹ کلن دي.
تر اوسه ننګرهار کې ځايي طالب چارواکو د دې دوه پېښو په اړه څه نه دي ویلي.
