د «افغانستان د ځواکمنو ښځو غورځنګ» د کویټې څانګې غړو د پاکستان پلازمېنه اسلام آپاد کې د افغان خبریال سید قاسم هاشمي او سینمايي لوبغاړي حامد احساس د برخلیک معلومېدو غوښتنه وکړه.
رخشانه: د دې اعتراضي غورځنګ غړو په یوه اعلامیه کې لیکلي، دا دوه افغان وګړي له یو څه مودې راهیسې لادرکه شوي او کورنۍ یې په بې خبرۍ او اندېښنه کې دي.
د دوی په اعلامیه کې راغلي، د دې وضعیت دوام د هغوی د امنیت، روغتیا او اساسي حقونو په اړه اندېښنې راپورته کړې دي.
د دې غورځنګ غړو ویلي، ژوند، شخصي خوندیتوب او له جبري ورکېدو خپلواکي د هر انسان بنسټیز حق دی او هېڅ فرد نه باید له قانوني کړنلارو او د کورنۍ له خبرتیا پرته له لاسرسي ووځي.
د افغانستان د ځواکمنو ښځو غورځنګ غړو د پاکستان له دولت نه غوښتي، چې د سید قاسم هاشمي او حامد احساس د لادرکه کېدو په اړه بېړنۍ، رڼې او خپلواکه څېړنې وکړي.
معترضې ښځې وايي، که دا دوه افغان وګړي د پاکستان د دولت له خوا نیول شوي وي، باید د هغوی د ساتل کېدو د ځای، روغتیايي حالت او حقوقي وضعیت ژر تر ژره معلوم او کورنۍ یې په جریان کې کړای شي.
دوی د بشري حقونو له بنسټونو، ملګرو ملتونو، د خبریالانو له مدافعې بنسټونو او نړیوالې ټولنې غوښتي، چې دا قضیه جدي تعقیب کړي او د هغوی د برخلیک په اړه اقدام وکړي.
سید قاسم هاشمي او حامد احساس د روان لمریز کال د چنګاښ د میاشتې په ۱۳ مه ماخوستن کابو اته بجې د پاکستان له اسلام آباد ښار څخه لادرکه شوي دي.
د دې دوه افغان وګړو لادرکه کېدو، د خبریالانو، رسنیزو فعالانو او د بشري حقونو د بنسټونو له هغې جملې د بښنې نړیوال سازمان غبرګونونه له ځان سره درلودل.
رسنیز فعالان، خبریالان او د بشري حقونو بنسټونه د دې دوه افغان وګړو د برخلیک د معلومېدو غوښتنه کوي.
د دې دوه افغان وکړو له ورکېدو د شاوخوا دریو میاشتو په تېرېدو سره، تر اوسه د پاکستان حکومت د دې پېښې په اړه هېڅ ډول غبرګون نه دی ښودلی.
