د بښنې نړیوال سازمان آسیايي څانګه وايي، افغانستان کې د طالبانو له لوري د میلیونونه نجونو، پنځه کاله له زده کړو محرومیت «پنځه کاله بې عدالتي» ده.
رخشانه: دې بنسټ نن پشنبنې د (وږي ۲۶ مه) په خپله اېکس لیکلي، نن له هغې ورځې پنځه کاله تېرېږي، چې طالبانو د نجونو زده کړې بندې کړې دي.
د بښنې نړیوال سازمان ویلي، افغانستان کې د نجونو په زده کړو د طالبانو له محدودیت سره سره، لا هم ډېری د هغو مقاومت ته دوام ورکوي.
د بښنې نړیوال سازمان په وینا، افغان نجونې د زده کړې لپاره په پټو انلاین ټولګیو کې ګډون کوي او یا هم د زده کړو د دوام لپاره د هېواد بهر ځي.
دې بنسټ د افغان ښځو او نجونو د ملاتړ غوښتنه کړې او له نړیوالې ټولنې یې غوښتي، چې طالبان د نجونو د ښوونځیو د پرانستلو لپاره تر فشار لاندې راولي.
د ملګرو ملتونو د ماشومانو ملاتړي صندوق (یونیسف) هم په خپله اېکس پاڼه لیکلي، له هغې ورځې پنځه کاله تېرېږي، چې افغان نجونې له منځنیو زده کړو محرومې شوې دي.
د دې بنسټ په وینا، په ۲۰۲۱ کې د طالبانو له لوري د دې محدودیت له لګولو وروسته، ۲.۶ میلیونه افغان نجونې له منځنیو زده کړو بې برخې شوې دي.
یونیسف په ټينګار سره وايي، د دې وخت رارسېدلی، چې نور افغانستان کې د نجونو پر مخ د ښوونځیو دروازې پرانستل شي.
