د افغانستان د بشري حقونو لپاره د ملګرو ملتونو ځانګړی راپور ورکوونکی وايي، له شپږم ټولګي بره افغان نجونو په وړاندې د طالبانو محدودیت ظلم دی او ښايي د بشریت په وړاندې جرم وګڼل شي.
رخشانه: بنټ نن پنشنبې د (وږي ۲۶ مه) په خپله اېکس پاڼه لیکلي، ۱۸۲۶ورخې کېږي، چې له شپږم ټولګي بره افغان نجونې ښوونځي ته له تګ محرومې دي.
هغه ویلي: «نن ورځ دقیقا د افغان نجونو پر مخ د ښوونځیو له تړل کېدو پنځه کاله تېرېږي. یو نسل نجونو د منځنیو زده کړو ټولې دورې له لاسه ورکړې دي.»
د هغه په وینا، د طالبانو تر واک لاندې افغانستان په نړۍ کې یوازینۍ هېواد دی، چې نیمايي وګړي یې د منځنیو او لوړو زده کړو څخه محروم دي.
بنټ ټینګار کړی، چې دې وضعیت نه یوازې پر نجونو پراخه اغېزې له هغې جملې د هغوی په رواني روغتیا اغېز کړی، بلکې په اوسني وضعیت او د هېواد په راتلونکې یې هم ژورې اغېزې لري.
د افغانستان د بشري حقونو لپاره د ملګرو ملتونو ځانګړي راپور ورکوونکي ویلي، دا وضعیت نه یوازې د منلو نه دی، بلکې ټکان ورکوونکی او ښايي د بشریت په وړاندې جنایت وګڼل شي.
هغه له طالبانو غوښتي، چې د یوې جامع درسي پروګرام په ترڅ کې له شپږم ټولګي پروته نجونو پر مخ د ښوونځیو دروازې پرانیزي.
بنټ ټینګار کړی، د هغه حکومت عادي کول، چې په سیستماتیک ډول ښځې او نجونې ځوروي او ځپي، د منلو نه دی.
د افغانستان د بشري حقونو لپاره د ملګرو ملتونو ځانګړي راپور ورکوونکي د افغان نجونو تر څنګ د درېدو غوښتنه کړې ده.
