ملګرو ملتونو کې د افغانستان د دایمي استازولۍ سرپرست نصیر احمد فایق وايي، افغان ښځې او نجونې لا هم له خپلو اساسي حقونو محرومې دي، او دا محرومیت نه شو کولی د دین، کلتور یا دود په توګه توجیهه کړو.
رخشانه: فایق پرون چهارشنبې د (وږي ۲۵ مه) د طالبانو تر واک لاندې افغانستان د وضعیت په اړه، د ملګرو ملتونو د امنیت شورا په غونډه کې د هزاره ګانو او شعیه وګړو په وړاندې د طالبانو د فشارونو د زیاتوالي پر دوام اندېښنه وښوده.
هغه په دې غونډه کې ویلي، افغان ښځې لا هم د کار، تګ راتګ او په عمومي ژوند کې د ګډون له سختو محدودیتونو سره مخ دي.
فایق زیاته کړې: «شاوخوا ۲.۴ میلیونه افغان نجونې لا هم له لومړنیو زده کړو محرومې دي. افغانستان په نړۍ کې یوازینۍ هېواد دی، چې نجونې په کې له لومړنیو ورپورته زده کړو څخه په رسمي ډول محرومې کړای شوې دي.
د فایق په وینا، طالبانو دیني مدرسو ته د رسمي زده ګړو د ځای ناستې په توګه پراختیا ورکړې. دغه موضوع چې د ترهګرۍ په اړه یې د خلکو اندېښنې زیاتې کړې دي.
په ملګرو ملتونو کې د افغانستان د سیاسي استازولۍ سرپرست ټینګار کړی، چې په افغانستان کې د زده کړو بحران، یوازې د ښځو د حقونو بحران نه، بلکې یو ملي بحران دی، چې د افغانستان اوږد مهاله اقتصاد، روغتیا او پراختیا یې تر اغېز لاندې راوستې ده.
هغه په ډاګه کړه، هېڅ ډول سیاسي بهیر د مشروعیت ادعا نه شي کولی، په داسې حال کې، چې ښځې د هېواد د راتلونکې په اړه له پرېکړې څخه بې برخې دي.
فایق د ملګرو ملتونو له ټولو غړو هېوادونو غوښتي، چې د افغان ښځو او نجونو په اړه ځانګړی دریځ ولري او د هغوی له اساسي حقونو دفاع وکړي.
ملګرو ملتونو کې د افغانستان د دایمي استازولۍ سرپرست وايي، له طالبانو سره اړیکې باید هېڅکله د بنسټیز تبیض منلو باندې بدلې نه شي.
هغه د طالبانو تر واک لاندې افغانستان کې د بشري حقونو وضعیت اندېښمنوونکی وباله او ویې ویل یوازې د مي او جولای میاشتو تر منځ یوناما، د پخوانیو چارواکو او امنیتي ځواکونو په وړاندې د ۱۲ مورده وژنو، ۱۳ مورده خپل سرو نیونو او درې مورده ربړونې یا ناوړه چلند پېښې مستندې کړې دي.
د هغه په وینا، د خلکو په وړاندې هدفي وژنې او د طالبانو غچ اخیستنې دوام لري.
فایق زیاته کړه، طالبانو د خبریالانو نیولو ته دوام ورکړی، د رسنیو فعالتیونه یې درولي او د هغوی منځپانګه یې سانسور کړې، بدني سزاوې یې تر سره کړې او مدني فضا یې په شدت سره محدوده کړې ده.
نوموړی وايي، افغانستان کې ۲۳ میلیونه خلک بشري مرستو ته اړتیا لري او ۱۳.۸ میلیونه کسان د خوړو له سختې ناامنۍ سره مخ دي. ده له افغانستان سره د مرستو د دوام غوښتنه وکړه.
په ملګرو ملتونو کې د افغانستان د دایمي استازولۍ سرپرست، له ملګرو ملتونو او نړیوالې ټولنې غوښتي، چې د افغان ښځو د حقونو د ملاتړ، سیاسي بهیر، بشري حقونو، له ترهګرۍ سره د مبارزې او افغانستان سره د بشري مرستو د ملاتړ لباره یې منسجمه تګلاره ولري.
