کاپیسا کې ځايي طالب چارواکي وايي، د دې ولایت تګاب ولسوالۍ کې د «کورنۍ دښمنۍ» په ترڅ کې د دریو ښځو او یوه ماشوم په ګډون، د یوې کورنۍ څلور غړي وژل شوي دي.
رخشانه: کاپیسا کې د طالبانو د امنیه قوماندانۍ ویاند عبدالفتاح فایز وايي، دا پېښه نن سهار وختي (دوشنبې د وږي ۳۰ مه) د تګاب ولسوالۍ په «ببر خواجه» سیمه کې رامنځ ته شوې ده.
د فایز په وینا، دا پېښه د کورنۍ دښمنۍ په ترڅ کې رامنځ ته شوې ده.
هغه زیاته کړې، په دې پېښه کې د یوې کورنۍ څلور غړي وژل شوي، چې درې ښځې او یو ماشوم دی.
د یادې پېښې د قربانیانو د سن او هویت په اړه معلومات په لاس کې نشته.
دا کسان د کلاشینکوف په ډوزو سره وژل شوي دی.
کاپیسا کې د طالبانو د امنیه قوماندانۍ ویلي، د دې پېښې یو تن عامل یې نیولی او د پاتې کسانو د نیولو لپاره هڅې روانې دي.
هر کال لسګونه کسان، په ځانګړې توګه ښځې او ماشومان د هېواد په یو شمېر ولایتونو کې د شخصي او کورنیو دښمنیو قرباني کېږي.
