ننګرهار کې ځايي سرچینې وايي، د دې ولایت «دره نور» ولسوالۍ کې یوه سړي خپل ۱۲ کلنه لور، د پیسو په بدل کې یوه ۷۰ کلن سړي ته په نکاح ورکړې ده.
رخشانه: ننګرهار کې دوه ځايي سرچینو ویلي، دا نجلۍ د دره نور ولسوالۍ د «دره شیمول» او سړی د «اتران» کلي اوسېدونکی دی.
د سرچینو په وینا، دا ماشومه نجلۍ د ۳۵۰ زره افغانیو په بدل کې یوه زاړه سړي ته په نکاح ورکړل شوې ده.
سرچینو زیاته کړې، دا ماشومه نجلۍ شاوخوا یوه اوونۍ وړاندې دې ۷۰ کلن سړي ته ورکړل شوې ده.
د سیمې اوسېدونکو له طالبانو غوښتي، چې د دې نجلۍ له پلورلو مخنیوی وکړي او پلار ته یې سزا ورکړي.
تر اوسه ننګرهار ولایت کې ځايي طالب چارواکو په دې اړه څه نه دي ویلي.
واک ته د طالبانو تر بیا رسېدو وروسته، په هېواد کې د ماشومتوب ودونه، په بې مخینې توګه زیات شوي دي.
د دې ډلې غړو هم په تېرو څه باندې پنځو کلونو کې، د هېواد په یو شمېر ولایتونو کې له کم عمره نجونو سره په زور ودونه کړي دي.
