د کابل لوېدیځ دشت برچي سیمه کې ځايي سرچینې وايي، طالب ځواکونو «فاطمه الزهرا کلېنیک» چې د «ایرانیانو په کلېنیک» مشهور دی، بند کړی دی.
رخشانه: دشت برچي کې لږ تر لږه دریو سرچینو ویلي، دا کلېنیک چې د «د مدرسې تمځای» کې موقعیت لري، پرون یکشنبې د (تلې ۵ مه) د طالب ځواکونو له خوا تړل شوی دی.
د سرچینو په وینا، د طالبانو ځواکونو پرون په دې روغتیايي مرکز ورغلي او د ناروغانو په ګډون یې ټول کارکوونکي له ودانۍ ایستلي او وروسته یې هغه تړلې ده.
سرچینو زیاته کړې، طالب ځواکونو د دې روغتیايي مرکز کارکوونکو ته ویلي «د دې کلېنیک ځمکه د دولتي او شنې ساحې اړوند» ده.
د سرچینو په وینا، طالب ځواکونو له قانوني حکم درلودو پرته، دا روغتیايي مرکز وتاړه او د هغې ټول روغتیايي فعالیتونه یې درولي دي.
فاطمه الزهرا کلېنیک د یوې ایرانۍ موسسې « د سبز پارسیان ملاتړي خیریه بنسټ
» له خوا په دشت برچي کې جوړ شوی وو او خلکو ته یې په کمه بیه خدمات وړاندې کول.
دا روغتیايي مرکز خاتم النبیین مدرسې ته نېږدې جوړ شوی دی. دا مدرسه هم تېره اوونۍ د طالب ځواکونو له خوا وتړل شوه.
د طالبانو له خوا د فاطمه الزهرا کلېنیک تړلو خلکو، په ځانګړې توګه د دشت برچي اوسېدونکو ته اندېښنې راپورته کړې دي.
د سیمې اوسېدونکو د دې روغتیايي مرکز د بیا پرانستو غوښتنه کړې ده.
طالبانو تر اوسه د دې روغتیايي مرکز د تړلو په اړه څه نه دي ویلي.
