ننګرهار کې سیمه ییز طالب چارواکي وايي، د دې ولایت خوګیاڼو ولسوالۍ کې د یوې ناچاودې مرمۍ د چاودنې له امله، درې ماشومان وژل شوي او یو بل ټپی شوی دی.
رخشانه: ننګرهار کې د طالبانو د امنیه قوماندانۍ ویاند سید طیب حماد وايي، دا پېښه پرون مازیګر (سه شنبې د تلې ۷ مه) څلور بجې، د دې ولایت د خوګیاڼو ولسوالۍ د «زاوه» په سیمه کې رامنځ ته شوې ده.
حماد ویلي، دا مرمۍ هغه مهال چاودلې، چې ماشومانو پرې لوبې کولې.
نوموړي زیاته کړې، چې د مرمۍ د چاودنې په ترڅ کې درې ماشومان وژل شوي او یو بل ټپی شوی دی.
ټپي ماشوم د درملنې لپاره روغتون ته لېږدول شوی، خو د روغتیايي وضعیت په اړه یې معلومات نشته.
ننګرهار کې یوې سرچینې د دې پېښې د پخلي تر څنګ ویلي، دا څلور واړه ماشومان د یوې کورنۍ غړي وو.
د سرچینې په وینا، دا ماشومان د ۸ تر ۱۲ کلونو تر منځ وو او څلور واړه هلکان وو.
سره له دې، چې هر کال په ماین او ناچاودو توکو لړلو سیمو د پاکولو هڅې روانې دي، خو لا هم د هېواد په ځينو ولایتونو کې ځینې سیمې په ماینونو او ناچاودو توکو لړلې دي.
هېواد کې هر کال لسګونه کسان په ځانګړې توګه ماشومان، د پخوانیو جګړو څخه د پاتې ماینونو او ناچاودو توکو د چاودنو قرباني کېږي.
د «هلوترست» ماین پاکولو موسسې د شمېرو له مخې، په هېواد کې کابو درې میلیونه او ۳۰۰ زره کسان لا هم په ماینونو او ناچاودو توکو لړلو سیمو په یو کیلومترۍ کې ژوند کوي.
