د طالبانو د حج او اوقافو وزارت په یوه تازه لارښونه کې، په هېواد کې ټولنیزې شبکې د ټولنې له منخه وړلو یو لامل بللی وايي، په دې شبکو کې په ناسمو خبرونو باور کول «لویه ګناه» ګڼل کېږي.
رخشانه: دا کړنلاره نن (پنشنبې د تلې ۹ مه) « له ټولنیزو شبکو ناوړه ګټه اخیستنې» تر عنوان لاندې خپره شوې او د هېواد په ټولو جوماتونو کې له خطیبانو او ملاامامانو غوښتل شوي، چې د جمعې په لمانځه کې په دې اړه خلکو ته وینا وکړي.
یاد وزارت په دې لارښوونه کې ویلي، ټولنیزې شبکې د ټولنې له منځه وړلو په یوه عامل بدلې شوې او دا شبکې په هېواد کې د ډېرو فتنو سرچینې دي.
دې وزارت په خپل لارښود کې لیکلي، مسلمانان له ټولنیزو شبکو «د معلوماتو تر لاسه کولو او خپلو اړتیاو پوره کولو» پر ځای د «ګناه، دروغو او اوازو» د خپرولو لپاره کار اخلي.
طالبانو په دې کړنلاره کې له خلکو غوښتي، چې په ټولنیزو شبکو د ناسمو خبرونو له خپرولو ډډه وکړي، ځکه دا کار د «منافقینو له خصلتونو» دی او «لویه ګناه» ګڼل کېږي.
د طالبانو د حج او اوقافو وزارت لیکلي، په ټولنیزو شبکو د خلکو د انځورونو خپرول او په دې شبکو کې د هغوی د ژوند د شخصي رازونو افشا کول، د خلکو نوم بدي کول او «له لویو ګناوو» څخه ده.
په دې لارښود کې راغلي «په ټولنیزو شبکو د نامحرمو کسانو انځور ته کتل او د دې شبکو له لارې د ښځو او نارینه وو تر منځ د اړیکو ټینګول هم له «لویو ګناوو» څخه ګڼل کېږي.
په دې تګلاره کې راغلي، «د ټولنیزو شبکو له لارې به ټولنه کې فحشا او بې حیايي پراخېږي، ځوانان د منکراتو لوري ته کاږي او د خیر کارونه پرېږدي.»
په دې لارښود کې همدارنګه ویل شوي، ځوانان د دې شبکو له لارې د نڅا او ګډا پروګرامونه ګوري، چې دا کار حرام او ګناه ده.
همدارنګه یاد وزارت زیاته کړې، د دې ډلې ډېری دولتي کارکوونکي هم په ادارو کې د خلکو د کار د ترسره کولو پر ځای، په ټولنیزو شبکو بوخت دي او په همدې خاطر دې ډلې په دولتي ادارو کې د ځیرکو تلېفونونو د نه کارولو امر کړی دی.
دې وزارت لیکلي، د ټولنیزو شبکو کارول سره له دې، چې لګښت لري، د کاروونکو د بداخلاقۍ سبب هم کېږي، ځکه هغوی ټوله ورځ په دې شبکو کې دروغ، فشحا، بدې خبرې و بې حیا شیان ګوري.
د طالبانو د حج او اوقافو وزارت په داسې حال کې دغه امر صادر کړی دی، چې دې ډلې په تېرو پنځو کلونو کې په وار وار په ټولنیزو شبکو خپل منتقدان نیولي او زنداني کړي دي.
همدارنګه طالبانو د ټولنیزو شبکو کارکوونکو ته لا هم اجازه نه ورکوي، چې د ټولنیزو رسنیو د کاروونکو د څارنې، خبرونو سانستو او د انتقادي منځپانګو د خپرولو په مخنیوي سره پر دې ډلې نیوکې وکړي.
