ننګرهار کې سیمه ییز طالب چارواکي وايي، د دې ولایت مرکز جلال آباد ښار کې یوه ښځه د خپل مېړه له خوا په ډزو وژل شوې ده.
رخشانه: ننګرهار کې د طالبانو د امنیه قوماندانۍ ویاند سید طیب حماد ویلي، د دې ښځې وژنه نن (شنبې د لړم ۱۵ مه) د جلال آباد ښار د درېیمې ناحیې اړوند سیمه کې رامنځ ته شوې ده.
نوموړي زیاته کړې، دا ښځه د خپل کور مخې ته په ډزو وژل شوې ده.
د مېړه له خوا د دې ښځې د وژل کېدو دلیل نه دی معلوم شوی او د عمر او هویت په اړه یې هم معلومات په لاس کې نشته.
طالبانو ویلي، د دې ښځې د مېړه د نیولو لپاره یې هڅې پیل کړې دي.
پر هېواد د طالبانو په تېره څه باندې پنځه کلنه واکمنۍ کې، د کورنیو د غړو له خوا د ښځو او نجونو وژنې بې مخینې زیاتې شوې دي.
د رخشانې رسنۍ د شمېرو له مخې، د روان میلادي کال له پیل تر اوسه پورې، لږ تر لږه ۲۶ ښځې د هېواد په بېلا بېلو برخو کې د خپلو کورنیو د غړو له خوا وژل شوې دي.
د یادونې ده، چې د کورنیو د غړو په لاس د ښځو او نجونو د وژل کېدو ډېری پېښې د طالبانو د محدودیتونو له امله نه رسنیزې کېږي.
