غور کې یوې باوري سرچینې ویلي، د دې ولایت تیوره ولسوالۍ کې یوه ښځه د خپل خاوند له خوا په «وحشتناک» ډول شکنجه او وژل شوې ده.
رخشانه: سرچینې د هویت پټ ساتلو سره رخشانې رسنۍ ته ویلي، دا ځوانه ښځه دوه اوونۍ وړاندې د تیوره ولسوالۍ د «پشت تنګي سرپنک» کلي کې د خپلو ماشومانو د سترګو په وړاندې وژل شوې ده.
د سرچینې د خبرو له مخې، دا ښځه نوریه نومېده، ۳۲ کاله یې عمر او د څلورو زامنو مور وه.
سرچینې زیاته کړې، نوریه په اصل کې د غور ولایت د پسابند ولسوالۍ د «خواجه» کلي اوسېدونکې او کابو ۱۰ کاله وړاندې یې واده کړی وو.
د سرچینې په وینا، نوریه له خپلې خواښې سره تر لفظي شخړې وروسته، د مېړه له خوا په ناوړه ډول شکنجه شوې او بدن یې په سره سیخ داغل شوی وو.
سرچینه وايي، د نورې مېړه هغه د خپلو ماشومانو د سترګو په وړاندې وهلې ټکولې او بدن یې په سره سیخ ور داغلی دی.
په هغه ویډیو کې چې د نوریې له سوځول شوي جسد څخه رخشانې رسنۍ تر لاسه کړې، د هغې د بدن ډېره برخه توره او ټوکلې ښکاري، چې د خپرېدو وړ نه ده.
د دې ویډیو شالید کې د ښځو د چیغو او زاریو غږ اورېدل کېږي، چې د نوریې خپلوانې دي.
سرچینې رخشانې رسنۍ ته ویلي، د نوریې جسد یوه شپه او ورځ د خپلو ماشومانو په وړاندې په کور کې ساتل شوی او وروسته خاورو ته سپارل شوی دی.
د سرچینې د ادعاوو په وینا، په هغه ورځ د نوریې مېړه د کلي په جومات کې د لمانځه تر ادا کولو وروسته، د خپلې ښځې په وژلو اعتراف کړی او ځان یې طالبانو ته تسلیم کړی دی.
تر اوسه غور کې طالب چارواکو په دې اړه څه نه دي ویلي.
د روان لمریز کال په لومړیو کې یوه بله مېرمن هم د غور ولایت پسابند ولسوالۍ کې د خپل خاوند له خوا په ناوړه ډول وژل شوې وه.
