د «افغانستان د ځواکمنو ښځو غورځنګ» غړو، د ښوونکي نړیوالې ورځې په مناسبت ویلي، افغانستان کې له زده کړو د نجونو محرومولو، له ښوونکو او راتلونکي متخصص نسل څخه د دې هېواد محرومول دي.
رخشانه: د دې اعتراضي غورځنګ غړو نن (دوشنبې د تلې ۱۳ مه) په یوه اعلامیه کې ویلي، افغان ښځینه ښوونکې په سختو شرایطو، محدودیتونو او تر زیاتو فشارونو لاندې خپلې دندې تر سره کوي.
په اعلامیه کې راغلي، هېڅ ټولنه د کیفیت لرونکو زده کړو او د ښوونکي مقام ته له درناوي پرته، سولې، پراختیا او تل پاتې ثبات ته نه شي رسېدای.
د دې غورځنګ غړو ویلي، د طالبانو تر واکمنۍ لاندې د افغانستان د زده کړو او پوهنې سکتور له ژورو اقتصادي، ټولنیزو او جوړښتني ستونزو سره مخ دی.
د دوی په وینا، بېوزلي، د امکاناتو او ښوونیزو سرچینو کمښت، د ښوونکو د استوګنې ستونزې، کاري محدودیتونه، او د زده کړو د فرصتونو کمېدا، د هېواد راتلونکی نسل له جدي ګواښ سره مخ کړی دی.
معترضو ښځو ویلي، د طالبانو له خوا د ثانوي او لوړو زده کړو څخه د نجونو محرومیت او د زده کړې په برخه کې د ښځو پر فعالیتونو لګول شوي محدودیتونه نه یوازې د دوی بنسټیز حقونه تر پښو لاندې کوي، بلکې د افغانستان علمي او انساني راتلونکې ته هم زیان رسوي.
دوی ټینګار کړی، چې زده کړې د هر انسان بنیادي حق دی او نه باید د جنسیت، بېوزلې، د ژوند ځای یا ټولنیزو شرایطو پر بنسټ له چا واخیستل شي.
د افغانستان د ځواکمنو ښځو غورځنګ غړو له هېوادوالو وغوښتل، چې د نجونو له زده کړو د محرومیت او د پوهنې نظام د کمزوري کېدو په وړاندې بې تفاوته پاتې نه شي.
معترضو ښځو د ټولو نجونو او هلکانو لپاره د زده کړې د برابرولو، د ښوونکو د ملاتړ، د هغوی د اقتصادي او مسلکي حالت د ښه کولو او د زده کړې لپاره د خوندي او له تبعیضه پاک چاپېریال د رامنځ ته کولو غوښتنه وکړه.
دوی له نړیوالې ټولنې، ملګرو ملتونو او نړیوالو بنسټونو نه هم وغوښتل، چې له ښوونکو او د افغان نجونو د زده کړو له حق څخه ملاتړ وکړي.
طالبانو په تېرو څه باندې پنځو کلونو کې د ښځو او نجونو په وړاندې له ۱۰۰ زیات فرمانونه صادر کړي، چې د تبعیض په بنسټیز کولو سره یې له هغوی خپل اساسي حقونه اخیستي دي.
د وروستیو اټکلونو له مخې، که د نجونو په زده کړو او تحصیل د طالبانو محدودیتونه همداسې دوام ولري، افغانستان به تر ۲۰۳۰ کال پورې ښايي ۲۵ زره ښځینه ښوونکي او روغتیايي ځواک له لاسه ورکړي.
