د «ښځو د آزادۍ شبکې» غړو د ښوونکي نړیوالې ورځې په مناسبت ویلي، د طالبانو تر واک لاندې افغانستان کې، ډېری ښوونکي د کار او زده کړې له حق نه بې برخې شوي دي.
رخشانه: د دې اعتراضي غورځنګ غړو نن (سه شنبې د تلې ۱۴ مه) په یوه اعلامیه کې ټولو افغان ښوونکو ته د ښوونکي د نړیوالې ورځې مبارکي ویلې ده.
د «ښځو د آزادۍ شبکې» په اعلامیه کې راغلي، ډېری افغان ښوونکي د کار او زده کړې له حق نه پاتې شوي او میلیونونه نجونې ښوونځي ته د تګ له حق نه محرومې شوې دي.
د دې اعتراضي غورځنګ د غړو په وینا، دا موضوع یوازې د ښوونې موضوع نه ده، بلکې د یوه نسل او هېواد د رتلونکې مسئله ده.
معترضو ښځو لیکلي دي: «کله چې ښوونکی په کور وي، ټولګی تش وي او نجونې د ښوونځیو د تړلو دروازو تر شاه انتظار پاتې شي، څنکه کولی شو، د ښوونکي د نړیوالې ورځې په اړه خبرې وګړو؟»
د «ښځو د آزادۍ شبکې» غړو ویلي، دوی د افغان ښوونکو او زده کوونکو تر څنګ ولاړ دي او د هغوی د ملاتړ غوښتنه کوي.
دوی له نړیوالو بنسټونو، د ښوونې او بشري حقونو له سازمانونو وغوښتل، چې د محرومو ښوونکو او زده کوونکو نجونو غږ واوري او د هغوی د زده کړې او کار د حق لپاره عملي ګام پورته کړي.
طالبانو په تېرو څه باندې پنځو کلونو کې د ښځو او نجونو په وړاندې له ۱۰۰ زیات فرمانونه صادر کړي او هغوی یې خپلو اساسي حقونو ته له لاسرسي بې برخې کړي دي.
د ملګرو ملتونو د راپورونو له مخې، که د نجونو د زده کړې او تحصیل په وړاندې د طالبانو محدودیتونه همداسې دوام وکړي، نو افغانستان به تر ۲۰۳۰ کال پورې ۲۵ زره ښوونکي او روغتیايي ځواک له لاسه ورکړي.
