د ملګرو ملتونو د ښځو څانګه (UN Women) د نجلۍ نړیوالې ورځې په مناسبت ویلي، نړۍ کې هر کال له ۱۲ میلیونه زیاتې نجونې ۱۸ کلنۍ ته تر رسېدو مخکې واده کوي.
رخشانه: دې بنسټ نن (شنبې د تلې ۱۸ مه) د یوې اعلامیې په خپرولو سره د ماشومتوب واده، د پای ته رسولو غوښتنه کړې ده.
دې سازمان اعلان کړی، چې نړۍ کې هر کال له ۱۲ میلیونه زیاتې نجونې ۱۸ کلنۍ ته تر رسېدو وړاندې واده کوي، یعنې په هرو دریو ثانیو کې له هرو پنځو نجونو یوه یې د ماشومتوب په دوران کې واده کوي.
ملګرو ملتونو لیکلي: «د دې هرې یوې شمېرې تر شا یوه داسې نجلۍ شتون لري، چې زده کړې، روغتیا، امنیت، د غواري حق او راتلونکې یې له خطر سره مخ کېدونکې ده.»
دې بنسټ د ماشومتوب ودونو په مخنیوي ټینګار کړی وايي، هره نجلۍ باید په خپلواکه توګه لویه شي تر څو وکولی شي خپله راتلونکې انځور او جوړه کړي.
ملګرو ملتونو زیاته کړې، ماشومانه ودونه د مخنیوي وړ دي او په دې برخه کې پرمختګ امکان لري.
د دې بنسټ په وینا، په تېرو ۲۵ کلونو کې یې د نجونو د زده کړو، قوانینونو د اصلاح او ټولنیز ملاتړ په برخه کې مرسته کړې تر څو د شاوخوا ۶۸ میلیونه ماشومانه ودونو مخنیوی وشي.
ملګرو ملتونو له دولتونو، نړیوالې ټولنې او خصوصي سکتور څخه غوښتي، چې د ملاتړو قوانینو په پلي کولو، د نجونو د زده کړو زمینې برابرولو او اساسي خدماتو په پراختیا سره، د هغوی له حقونو ملاتړ وکړي.
همدارنګه دې بنسټ له ناوړه باورونو سره د مبارزې او د بېوزلۍ، جګړې، بې ځایه کېدو، معیوبیت او بحرانونو په وړاندې د زیان مننونکو نجونو پر ملاتړ ټينګار کړی دی.
د طالبانو تر واک لاندې افغانستان کې هم ۱۸ کلنۍ ته تر رسېدو وړاندې د ماشومانه ودونو پدیده په بې مخینې توګه زیاته شوې ده.
طالبانو غړو هم په تېرو څه باندې پنځو کلونو کې، د هېواد په یو شمېر ولایتونو کې کم عمره نجونې په جبري توګه واده ته اړ کړې دي.
