د هېواد پخواني ولسمشر حامد کرزي د نجونو نړیوالې ورځې په مناسبت خپل پیغام کې ژر تر ژره د نجونو پر مخ د ښوونځیو او پوهنتونونو د پرانستل کېدو
رخشانه: ښاغلي کرزي نن (یکشنبې د تلې ۱۹ مه) په خپله اېکس پاڼه د یوه پوسټ په خپرولو سره ویلي، افغانستان د پرمختګ او پراختیا لپاره باید تل د نجونو پیاوړتیا ته پاملرنه وکړي.
هغه لیکلي دي: «د نجونو پیاوړتیا په هغه صورت کې امکان لري، چې نجونې له ټولو تعلیمي فرصتونو برخمنې وي او وکولی شي د لوړو علمي پړاونو په طی کولو سره د خپلو خلکو او هېواد د خدمت جوګه شي.»
د هېواد پخواني ولسمشر د نجونو پر پیاوړتیا ټینګار کړی او ژر تر ژره یې د هغوی پر مخ د ښوونځیو او پوهنتونونو د پرانستو غوښتنه کړې ده.
نوموړي لیکلي، د افغانستان خلک د لرغوني کلتوري تاریخ او ښځو او نجونو ته په ژور درناوي سره په کورنیو او نړیوالو کړیو کې د هغوی حیثیت، بریا او زړورتیا په ویاړ سره یادوي.
طالبانو د ۲۰۲۱ کال په اګست کې پر هېواد له بیا واکمنېدو وروسته، له شپږم ټولګي بره نجونې پر زده کړو بندیز ولګاوه او په پوهنتونونو کې یې د نجونو تحصیل هم بند کړ.
د نړیوالو بنسټونو او نړیوالې ټولنې له غوښتنو سره سره، طالبانو تر اوسه په هېواد کې د نجونو پر زده کړو او تحصیل لګولي بندیزونه پای ته نه دي رسولي.
