افغانستان کې د ملګرو ملتونو د ماشومانو ملاتړي صندوق (یونیسف) د نجونو نړیوالې ورځې په مناسبت ویلي، د هېواد په ځینو سیمو کې، له هرو دو نجونو یوه یې ۱۸ کلنۍ ته تر رسېدو مخکې واده کوي.
رخشانه: دې بنسټ نن (پنشنبې د تلې ۱۹ مه) په یوه اعلامیه کې د ماشومتوب ودونو د پای غوښتنه کړې او د هغوی د راتلونکې په اړه یې پر پانګونه ټينګار کړی دی.
یونیسف په خپله اعلامیه کې د نجونو په ملاتړ ټینګار کړی او له کورنیو، ټولنو او خپلو شریکانو یې د ماشومتوب ودونو د پای ته رسولو برخه کې د بېړني اقدام غوښتنه کړې ده.
دغه بنسټ زیاته کړې، د افغانستان د (۲۰۲۲-۲۰۲۳) د څو شاخصونو د کلستر سروې پر بنسټ، د ۲۰ او ۲۴ کلونو تر منځ ۲۸.۷ سلنه ښځې ۱۸ کلنۍ ته تر رسېدو مخکې واده شوې دي.
د ملګرو ملتونو د ماشومانو ملاتړي صندوق ویلي، د افغانستان په ځینو سیمو کې له هرو دوو نجونو یوې یې ۱۸ کلنۍ ته تر رسېدو مخکې واده کړی دی.
دا بنسټ وايي، د ماشومتوب واده د نجونو پر روغتیا او هوساینې ژورې پایلې لري، د هغوی زده کړې ګدوډوي او د راتلونکې فرصتونه یې محدودوي.
د دې بنسټ په وینا، د ماشومانو د واده پدیده، د تاوتریخوالي او ټولنیزې انزاو خطر زیاتوي او تر وخت مخکې امیندوارۍ او زېږون څخه خورېدونکي خطرونه شدیدوي.
یونیسف وايي، په امیندوارۍ پورې تړلې مړینې، په افغانستان کې د ۱۵ تر ۱۹ کلنو نجونو کې د مړینې اصلي لامل دی.
دې بنسټ «د نجونو د زده کړو د حق پر ساتنې، د ملاتړ پر پیاوړتیا، د زیان مننونکو کورنیو او ټولنو ملاتړ، د نجونو غږ اورېدلو او په اړینو خدماتو کې په پانګونې» ټینګار کړی دی.
دغه سازمان زیاتوي «که څه هم زده کړې په یوازې توګه نه شي کولی د ماشومتوب ودونه پای ته ورسوي، په ښوونځیو کې د نجونو ساتل د هغوی د حقونو د خوندیتوب تر ټولو اغېزمنه لار ده.»
افغانستان کې د یونیسف استازي ډاکتر تاج الدین اویوالي ویلي دي «هره نجلۍ د ماشومتوب د دورې وړ ده. هغه حق لري زده کړې وکړي، وده وکړي، په امن کې وي، خپلو مهارتونو ته وده ورکړي او د خپلې راتلونکې د جوړولو فرصت ولري.»
نوموړي زیاته کړې، د ډېرو نجونو ماشومتوب د کم عمره ودونو له امله له وخته مخکې پای ته رسېږي او له هغو فرصتونو بې برخې کېږي، چې باید د ژوند دغه مهم کلونه یې جوړي کړي.
دې بنسټ له طالبانو غوښتي، چې له شپږم ټولګي بره نجونو پر مخ د ښوونځیو دروازې پرانیزي.
