د افغان ښځو د رهبرۍ ښوونځي (سوله) بنسټګره او مشره شبانه راسخ وايي، د افغان ښځو د تحصیلي بورسیو لپاره یې ۲.۵ میلیون ډالر ځانګړي کړي دي.
رخشانه: نوموړې د شنبې شپه ناوخته (د تلې ۱۸ مه) په خپله اېکس پاڼه د یوه پوسټ په خپرولو سره لیکلي، دا پیسې یې د اکسفورډ پوهنتون د یوه مرستندویه بنسټ «وایډنلفډ- هافمن ترسټ» په همکارۍ ځانګړې کړې دي.
راسخ په خپله اېکس پاڼه زیاته کړې: «راتلونکی منی به په اکسفورډ پوهنتون کې د یوې افغان ښځې ژوند او مشري پیل شي. کال وروسته به بله ښځه ورسره یو ځای شي او دا پروسه به کال په کال له یوې ښځې و بلې ته دوام ومومي. بې صبره انتظار یم و وینم هر یو له دې ښځو به څه ډول راتلونکې رامنځ ته کړي.»
هغې ویلي، دا پیسې کولی شي دا امکان برابر کړی تر څو هر کال لږ تر لږه یوه افغان مېرمن وتوانېږي په اکسفورډ پوهنتون کې د ماسټرۍ په کچه زده کړې وکړي.
د نوموړې په وینا، پر دې پیسو سربېره به د زده کوونکو د خوراکي توکو او استوګنې د لګښتونو پوره کولو کلني تخصص تر څنګ د نورو لګښتونو لپاره هم یوه برخه ځانګړې کړي.
مېرمن راسخ وايي، د بورسیو تر لاسه کوونکې به د «وایډنفلډ- هافمن ترسټ» موسسې له خوا د وړاندې شوي مشرتابه مهارتونو روزنیز پروګرام کې هم برخه واخلي.
نوموړې زیاته کړې، دا بورسیې به د هغو کسانو لپاره وي، چې د اکسفورډ پوهنتون د ۲۰۲۷ کال د سپټمبر میاشتې ښوونیز کال پیل کولو لپاره غوښتنه کوي.
طالبانو پر هېواد له بیا واکمنېدو وروسته، له شپږم ټولګي بره نجونې له زده کړو راګرځولې دي.
د طالبانو د دې محدودیتونو په ترڅ کې شاوخوا ۲.۵ میلیونه نجونې زده کړو او تحصیل ته له لاسرسي محرومې شوې دي.
