ایراني رسنیو راپور ورکړی، چې د دې هېواد په مشهد ښار کې یوه ځوان افغان وګړي خپله ۱۵ کلنه مېرمن په «وحشیانه» ډول وهلې ټکولې او وژلې یې ده.
رخشانه: «رکنا» رسنۍ راپور ورکړی، چې دا ځوانه ښځه دوه میاشتې وړاندې د خپل۲۲ کلن خاوند له خوا د مشهد ښار په «شهید رجايي» ښارګوټي کې وژل شوې ده.
د راپور له مخې دا ځوانه ۱۵ کلنه ښځه «شریفه . ب» نومېده او افغان وګړې وه.
په راپور کې راغلي، شریفه په «مجازۍ نړۍ د انځور خپرولو» په دلیل د مېړه له خوا «په لغتو، سوکانو او د موبایل د چارجر په لین په وحشیانه ډول وهل شوې» او وژل شوې ده.
د شریفې مېړه ویلي، په مجازي نړۍ یې د خپلې ښځې د انځور لیدلو څخه «غوسه» شو او هغه یې «په لغتو، سوکانو او د موبایل د چارجر په لین» وهلې ده.
راپور زیاتوي، شریفه د خپل خاوند د وهلو له امله بې هوښه شوې او وروسته روغتون ته لېږدول شوې، خو له څلور ورځو بستر کېدو وروسته یې هلته د مغزي خونرېزۍ له امله ژوند له لاسه ورکړی دی.
د شریفې خاوند د دې پېښې له رامنځ ته کېدو وروسته له سیمې تېښته کړې وه، چې د روان لمریز کال د وږي په ۲ مه نېټه د ایران د امنیتي ځواکونو له خوا نیول شوی دی.
هغه په لومړنیو اعترافونو کې د خپلې ښځې وژل منلي وايي «دا تمه مې نه وه، چې شریفه به خپل انځور په مجازي نړۍ نورو خلکو ته لېږي.»
د افغان وګړو له خوا په بهرنیو هېوادونو کې د خپلو مېرمنو وژل کومه تازه موضوع نه ده. له دې وړاندې هم په یو شمېر نورو هېوادونو کې ورته پېښې رامنځ ته شوې دي.
