د پولنډ «یاګیلونیا» پوهنتون کې د دکتورا دورې څېړونکي بسم الله تابان په دې هېواد کې د یوې ناستې پر مهال ویلي، افغان ښځو او نجونو د نورو په پرتله د طالبانو له محدودیتونو زیات زیان لیدلی دی.
رخشانه: دا غونډه پرون (چهارشنبې د تلې ۲۲ مه) د افغانستان پېژندنې او د دې هېواد د اوسني وضعیت په اړه، د یو شمېر پولنډي وګړو، څېړونکو او پوهنتون د محصلینو په ګډون د پولنډ «کراکوف) ښار په عمومي کتابتون کې جوړه شوې وه.
بسم الله تابان په دې ناسته کې ویلي، د طالبانو تر واک لاندې افغانستان کې ښځې له خپلو لومړنیو انساني حقونو، له هغې جملې له زده کړو، کار او په ټولنیز ژوند کې له ګډون څخه محرومې شوې دي.
هغه زیاته کړې، طالبانو په تېرو څه باندې پنځو کلونو کې په افغانستان کې په ځپلوپه تکیې سره خپلې واکمنۍ ته دوام ورکړی دی.
د نوموړي په وینا، طالبانو د پخواني حکومت د امنیتي او دفاعي ځواکونو غړي، د رسنیو کارکوونکي، د بشري حقونو مدافعین او معترضې ښځې هم له ځورولو او آزارولو سره مخ کړې دي.
تابان دځینو قومي او مذهبي ډلو په ځانګړې توګه د هزاره ګانو د سیستماتیکې او هدفي ځورونې په اړه اندېښنه ښودلې وايي، په ځينو مواردو کې د دې ډلې پر غړو فشار راوړل شوی او اړ ایستل شوي، چې خپل کرونه، ملکیتونه او د استوګنې ځایونه پرېږدي.
هغه د کابل لوېدیځ د امید سبز شهر څخه د سلګونو کورنیو د ایستلو په تړاو د طالبانو هڅې ته په اشارې سره ویلي، دغو اقدامانو په افغانستان کې د ملکیت حقونو، د کورنیو امنیت او د زیان منونکو کورنیو د وضعیت په اړه جدي اړېښنې راپارولې دي.
د بشري حقونو دې فعال د غوندې له ګډونوالو غوښتي، چې د افغانانو په ځانګړې توګه د ښځو او زیان منونکو ډلو غږ و اوسي او په نړیواله کچه د هغوی د وضعیت د منعکسولو لپاره هڅې وکړي.
تابان د افغان نجونو له زده کړو په عملي ملاتړ ټینګار کړی او له ګډونوالو یې وغوښتل، چې د امکان په صورت کې ان که د یوې نجلۍ لپاره هم وي، د خپل استوګن ښار کې د پوهنتون لوستلو زمینه دې ورته برابره کړي.
د دې غونډې جوړونکو و ویل، د دې لړۍ د پروګرامونو د پیلولو هدف د افغانستان معرفي کول، د هغه سیاسي او ټولنیزو پرمختګونو ته کتنه او د دې هېواد د خلکو د وضعیت په اړه د پولنډي اوسېدونکو د پوهاوي لوړول دي.
