غزني کې د طالبانو امنیه قومانداني وايي، د دې ولایت په اجرستان ولسوالۍ کې یو ماشوم د اوبو حوز ته لوېدلی او ژوند یې له لاسه ورکړی دی.
رخشانه: دا پېښه پرون جمعه د (تلې ۲۴ مه) مازیګر مهال د اجرستان ولسوالۍ د «خوشک آبي» کلي کې رامنځ ته شوې ده.
غزني کې د طالبانو امنیه قوماندانۍ په یوه خبرپاڼه کې ویلي، دا ماشوم سلطان نومېده او څلور کلن وو.
د خبرپاڼې له مخې، دا ماشوم پرون مازیګر د لامبو پر مهال په حوز کې ډوب شوی او وروسته یې ژوند له لاسه ورکړی دی.
یوه میاشت وړاندې هم یو دوه کلن هلک د غزني ولایت په رشیدانو ولسوالۍ کې د اوبو په حوز کې ډوب او ژوند یې له لاسه ورکړی وو.
هر کال د هېواد په یو شمېر ولایتونو کې لسګونه ماشومان څاه ګانو او د اوبو حوزو ته د لوېدو له امله ژوند له لاسه ورکوي.
دا پېښې د کورنیو د بې پروايۍ او د څاه ګانو او حوضونو د سرونو خلاصېدو له امله رامنځ ته کېږي.
د طالبانو تر واک لاندې د طبیعي پېښې سره د مبارزې ادارې څه موده وړاندې اعلان وکړ، چې په تېر یوه کال کې د ۶۶ ماشومانو او ۱۱ ښځو په ګډون ۱۴۸ تنه د هېواد په سیندونو کې د لوېدو له امله ژوند له لاسه ورکړی دي.
