اروپايي ټولنې ویلي، د طالبانو له خوا د ښځو او نجونو پر حقونو او اساسي خپلواکیو د طالبانو له خوا لګول شوي محدودیتونه د هغوی د وضعیت د لا خرابېدو لامل شوي دي.
رخشانه: دې بنسټ نن (سه شنبې د تلې ۲۸ مه) د یوې بیانیې په خپرولو سره، افغانستان کې د طالبانو له خوا پر ښځو او نجونو لګول شوي بندیزونه په کلکه غندلي دي.
اروپايي ټولنې په خپله اعلامیه کې لیکلي «له بشري حقونو سرغړونې او د ښځو او نجونو په وړاندې د طالبانو شدید جنسیتي توپیر او له خپلو اساسي حقونو، له هغې جملې له زده کړې، کار او آزاد تګ راتګ د هغوی محرومول، د هغوی د کلي وضعیت په خرابېدو تمام شوی دی.»
دې دفتر په ۲۰۲۶ کال کې د ښځو او نجونو د حقونو وضعیت خرابېدل او له شپږم ټولګي بره نجونو له زده کړو د محرومیت پر دوام اندېښنه ښودلې ده.
اروپايي ټولنې ویلي، له شپږم ټولګي بره نجونو پر زده کړو د طالبانو محدودیتونو له ۲.۲ میلیونه زیاتې نجونې اغېزمنې کړې او افغانستان په نړۍ کې یوازینۍ هېواد دی، چې نجونې په کې د زده کړو حق نه لري.
دې ټولنې په فوري او له قید شرط پرته د تبعیض ډک سیاسیتونو او په افغانستان کې د شځو او نجونو په وړاندې د طالبانو د پراخو محدودیتونو د لغوه کولو غوښتنه کړې ده.
اروپايي ټولنې د افغانستان له خپلواکو رسنیو، مدني سازمانونو، د بشري او ښځو په حقونو کې له فعالو بنسټونو او د بشري حقونو له مدافعینو د ملاتړ ډاډ ورکړی دی.
دې ټولنې لیکلي، د افغانستان خپلواکه رسنۍ او د بشري حقونو او ښځو د حقونو فعالین «له تړلې او خطره ډکې فضا سره سره» فعالیت کوي.
اروپايي ټولنې «کلتوري میراثونو ته د ګواښونو، د کلتوري آثارو او ملکیتونو د غیر قانوني کیندنو او قاچاق دوام، د کلتوري فعالیتونو، په ځانګړې توګه د ښځو خوندیتوب او د دوی د ژوند محدودیتونو» په اړه اندېښنه څرګنده کړې ده.
