د طالبانو د ډلې مشر هبت الله اخوندزاده کابل پوهنتون کې د وینا پر مهال و ویل، د قصاس او اعدام حکم د ده له تنفذي امر پرته نه پلی کېږي. هغه ادعا وکړه، چې د افغانستان ټول خلک د حنفي مذهب لارویان دي.
رخشانه: نوموړي دغه څرګندونې نن (سه شنبې د لړم ۲۶ مه) کابل پوهنتون کې د خپلو خواخوږ عالمانو تر منځ یوې ملاتړې غونډه ته وکړې.
کابل پوهنتون کې د طالبانو ډلې د خواخوږو عالمانو غونډه د دې ډلې «د مشر د فرمانونو د اغېز ارزونې» جوړه شوې وه او د څو ورځو لپاره به دوام وکړي.
دا ناسته د رسنیو له پوښښ پرته جوړه شوه او یوازې د طالبانو تر کنټرول لاندې غږیزو رسنیو پوښښ ورکړ او د دې ډلې مشر ته منسوب غږ یې خپور کړی دی.
د طالبانو مشر ته منسوب غږ چې د دې ډلې تر کنټرول لاندې رسنیو له خوا خپور شو، اخوندزاده ادعا کوي، چې د افغانستان ټول وګړي د حنفي مذهب لارویان دي.
د طالبانو مشر د خپلې وینا په یوه برخه کې هېواد وال له «رمې» سره ورته بللی ویلي یې دي، چې دی له وګړو د ساتنې مسوولیت په غاړه لري.
د طالبانو مشر ته منسوبې وینا په یوه بله برخه کې اورېدل کېږي، چې هغه له بهر مېشتو هېوادوالو غواړي بېرته هېواد ته راستانه شي او په خوندي چاپېریال کې ژوند وکړي.
نوموړي په خپله وینا کې په هېواد کې د طالبانو د نظام پر ساتنې ټینګار کړی دی.
په دې غونډه کې د بېلا بېلو ولایتونو دیني عالمانو ګډون کړی وو او یو ځل بیا یې د طالبانو له مشر سره بیعت وکړ.
په دې غونډه کې د طالبانو ملاتړو ملایانو د دې ډلې مشر هبت الله اخوندزاده ته د «شیخ الاسلام» لقب ورکړ.
یاده ناسته کې د طالبانو د مشر سربېره، د دې ډلې یو شمېر نورو لوړپوړو چاروکو هم ویناوې وکړې او د نظام پر ساتنې یې ټینګار وکړ.
طالبانو مشر په تېرو څه باندې پنځو کلونو کې د ښځو او نجونو پر ضد له ۱۰۰ زیات فرمانونه صادر کړي او د سختو او سیستماتیکو محدودیتونو په لګولو سره یې، د ټولنې د نیمايي وګړو حقونه له منځه وړي دي.
دا ډله د افغان ښځو او نجونو په وړاندې د سختو او پراخو محدودیتونو په لګولو سره د جنسیتي ځپنې نظام په بسټیز کولو تورنه ده.
د بشري او ښځو د حقونو مدافعانو او فعالانو په وار وار له نړیوالې ټولنې او د بشري حقونو له بنسټونو غوښتي، چې، د طالبانو تر واک لاندې افغانستان کې «جنسیتي توپیر» د جرم په توګه په رسمیت وپېژني.







